Mamosteyê tirkî Hudai Morsumbolo ke Mektebê Mîyanênî yê Ulubagli Hasanî yê Akdenizê Mersinî de wezîfe keno, seba ke wendekaranê xo reyde kurdkî û erebkî qisey kerd û ê teşfîqê dersa vîjnaye ya kurdkî kerdî, derheqê ci de ciperdayîş dîya destpêkerdene.

Netîceya cipersayîşî de cezaya ''birnayîşê meaşî'' dîyaye Morsumbulî. Qeraro ke hetê mufettîşan ra Morsumbulî rê şawîya de nê ameyî vatene. Rixmo ke verî zî gerreyê şima bi û şima ameyî hîşyarkerdene şima kewtî teberê programê perwerdeyê dersa tirkî û  dersa tirkî de wendekaran rê kurdkî û erebkî musna. Coka qerarê cezaya pereyî ame girewtene.

Mamosteyê 23 serran Morsumbul mektebo ke tede wezîfe keno ra Mektebê Yusuf Bayikî yê Yenitaşkentî rê amebi surgunkerdene.