Bajarê Marsilya yê Fransa de vera hêrişanê kîmyewîyan ê dewleta tirke yê vera gerîlayan çalakîyî bêmabên dewam kenê. Vizêr reyna bi vengdayîşê Merkezê Komelê Demokratîkî yê Kurdan û têgêrayîşê ciwanan çalakîya vindertişî ameye kerdene.

Şaro ke Meydanê Via Portî de ame pêser bi fransizkî pankarta 'Tirkî pê çekanê kîmyewîyan kurdan kişenî' akerd. Çalakwanan di saetî bêherektî cayê xo de payra vindetî û bêvengîya dezgehanê Ewropa şermezar kerd. Çalakwana seba ke bale biancê bêvengîya dezgehanê mîyanneteweyîyî ser fekê xo pê bandanê sîyayan girêdayî. Badê rêzgirewtişî vilaweke ameye wendene. Eşkerayîye de veng dîya OPCWyî ke wa derheqê çekanê kîmyewîyan de herême de cigêrayîş bikero.