Maya Haştîye: Wa şêrî cayê xo nêdê luwîyan

Rêxistina HDPyî bi armancê ameyox munaqeşe bikê kom bîye. Kombîyayîşî de Maya Haştîye Raîfe Ozbay cewab da pêşnîyazê ''Sîne-î Mîlletî'' û vat: " Wa şêrî cayê xo nêdê luwîyan. Ganî xoverdayîş her cephe de dewam biko''

Rêxistina HDPyî seba ke bale bianca tayînkerdişê qeyûman, tedaya şarê kurdan ser û ameyox muaqeşe bika hemserekanê HDPyî, temsîlkranê rêxistinanê sivîlan û partîyanê kurdan reyde Hilton Otelî de kombîyayîş kerd.

Zaf temsîlkarê rêxistinan, sendîkayan, waqif û partîyanê sîyasî, Mayanê Haştîye zî tede 500 kesî kombîyayîşî de amade bîyî. Kombîyayîşî de Hemserekê KCDyî Leyla Guven û Bedran Ozturk, Hemvervatoxê HDKyî Gulîstane Liliç Koçyîgît û Sedat Şenoglu, Hemsereko Pêroyî yê ÎHDyî Ozturk Turkdogan, Serekê OSPyî Sînan Çiftyurek, heyetê Îmrali ra Sirri Sureyya Onder, nuştoxe Oya Baydar, şaîr Ahmet Tellî, nuştox û rojnameger Huseyîn akyol, akademîsyen Baskin Oran û sîyasetmedare Nesrîne Nas zî tede zaf kesî amade bîyî. Partîya Saadetî (SP) ra zî Cîhangîr Îslam û parlamenterê CHPyî Mehmet Bekaroglu tewrê kombîyayîşî bîyî.Bername bi ameyîşê hemserekan Pervîne Buldan û Sezaî Temellî dest pêkerd. Kombîyayîşî ra verî sînevîzyon ame mojnayene. Bale ameye antene planê Islahata Şarkî û şîdetê vera HDPyî ser.

Ganî Ma Pîya Bibê û Xo Nêancê

Kombîyayîşî de  Meclîsê Mayanê Haştîye  ra Raîfe Ozbay bi kurdkî qisey kerd û vat: "Bi serran ma nê rayîrî de têkoşîn kenê. Ma way û biratîye waşte. La înan her tim hêrişê ma kerd. Ganî ma reyna destê xo bidê yewbînan û pîya têkoşîn bikê. Ganî ma wayîrê partîya xo û kulturê xo bivejîyê. Ma bi zorî hemşaredar û sîyasetmedaranê xo weçînenê. La ê wezîfeyanê xo ra yenê girewtene. Ganî şêrî meydanan ra xo peyser nêancê ke luwîyî herinda înan megêrê. Ganî hîna zêdêr ma bibê yew. Yewîye, yewîye, yewîye."

Hemşaredara Cizîrî Bêrîvane Kutlu zî vat: "Şarê Cizîrî qet têkoşînî ra fek vera nêda. Ma serra 2014î de şaredarîye girewte la înan serra 2016î de qeyûm tayînê ci kerd. Qeyûmî awil erjê şarê Cizîrî peykerê Orhan Doganî rijna. Şarê Cizîrî hema zî payan ser o û xo ver dano. Ma kurd ê. Şima nêeşkenê ma biqedînê."

Hemşaredarê Pêrîyî Orhan Çelebîyî zî vat: "Ma kooperatîf awan kerd. Her çiqas 13ê teşrîna peyêne de qeyûm ame tayînkerdene zî ma hema zî xebatê xo dewam kenê. Înan 38î de Dêrsim teslîm nêgirewt, 80î de nêgirewt û 13ê teşrîna peyêne de zî nêeşkayê teslîm bigêrê."