Mayanê Şemeyî hewteyê 814. yê çalakîya xo de aqîbetê Davut Altunkaynak, Seyhane dogan, Nedîm Akyon, Mehmet Emîn Arslan, Abdurrahman Olcay, Abdurrahman Coşkun û Suleyman Şahî yê ke serra 1995î de dima ke ameybî destbendkerdene dîyayî vînîkerdene, persayî.

Mayanê Şemeyî bale ante ser ke 'Dewaya JÎTEMî ya Kerboranî'  2ê teşrîna peyêne de Mehkemeya Ceza Girane ya 1. ya Semsûrî de do bêra dîyene û vat: ''Wa no bêcezaveradayîşê 25 serran biqedo; Dewaya JÎTEMî ya Kerboranî de edalet û huqûq bêrê caardene.''

Kekê Seyhan Doganî Kadrî Doganî eşkera kerd ke birayê ci hetê leşker û qoricîyan ra amebi destbendkerdene û dima tira xeberêke nêameye girewtene. Kadrî Dogan û dadîya ci dima dest pê cigêrayîşê Seyhanî kerd. Doganî vat: ''Dadîya mi têna edalet waştêne la ameye destbendkerdene. La dima Îstanbul de tewra Mayanê Şemeyî bîye. Dadîya mi 20 serrî verî û babîyê mi zî 10 serrî verî şîyî rehm. Ez venga her kesî dana ke verê na dewa de hîsger bibo.''

Kekê Abdurrahman Coşkunî Mehmet Coşkunî zî vat: ''Ma gêrenê edaletî la edalet nêaseno. Ma esteyê domananê xo dîyî la ma o edalet nêdî ke sûcdaran ceza bikero. Ma do dewaya xo ra fek vera nêdê.''

Babîyê Davut Altunkaynakî Abdulazîz Altunkaynakî vat: ''Ma do 2ê teşrîna peyêne de uca de bibê û edalet biwazê. Heta ke edalet nêro caardene ma do dewaya xo ra fek vera nêdê.''

Avûkatanê dewa ra Erdal Kuzuyî pare kerd ke dewa neqlê Semsûrî bîye û serran ra nata uca de dîyena. Kuzuyî vat: ''Nê prosesî de heyetê mehkeme vera vurîyayî. Dewaya JÎTEMî ya Kerboranî de dosyaya ma îsbat kena ke 7 sivîlî bi hawayêkê îlegalî ameyî destbendkerdene û înfazkerdene. Cenazayê 7 sivîlan zî dîyayî û nê cenazayan eşkera kerd ke nê 7 kesî senî ameyî înfazkerdene. Na dewa  xulasaya cînayetan a ke dewleta tirke serranê 1990an de kerdî.''

Nê hewteyî nameyê Mayanê Şemeyî ser o Salîha Şanli eşkerayîya çapemenîye wende. Salîha Şanli vat: ''Mabênê 29ê teşrîna verêne-8ê teşrîna peyêne ya 1995î de leşkeranê bi çekanê giranan û qoricîyan Kerboranê Mêrdînî de eştbî keyeyan ser û 4ê ci domanî, 2ê ci wendekarê lîseyî û 2ê ci zî cinîyî xeylêk kesî destbend kerdbî. Nê kesî ameybî berdene bi Taburê Cendirmeyan ê Kerboranî. Keyeyanê Davut Altunkaynak (12), Seyhan Dogan (13), Nedîm Akyon (16), Mehmet Emîn Aslan (19), Abdurrahman Olcay (20), Abdurrahman Coşkun (21), Suleyman Şahî (57) aqîbetê înan persaybî la leşkeran înan rê vatbi ke wextê îfadeyî de nê kesî vera dîyayê û şîyê koyan ser. Rixmê muracatanê keyeyan nê kesan ra dima xeberêke nêameye girewtene. Keyeyan rê gef ame wendene û îşkence ame kerdene, ê ameyî destbendkerdene. Serebûtî ra 4 mengan dima sereyo cêrakerde û bedeno vêşayîye yê Suleyman Seyhanî zereyê bîrêkî de ame dîyene.  Çawişo pispor Bîlal Batiriro ke no zanayîş dabi keyeyî Taburê Cendirmeyan ê Kerboranî de dîya vînîkerdene.

29ê gulana 2009î de xîretanê keyeyan û ÎHDyê Mêrdînî ra dima dosya hetê Serdozgerîya Komare ya Kerboranî de newe ra ameye akerdene. Eşkera bi ke nê 7 kesî kişîyayî û erzîyayî bîran. Serranê 2012,2013 û 2015î de netîceya îfadeyê şahîdan de esteyê nê kesan ameyî dîyene. Serra 2015î de Fermandarê Cendirmeyan ê Mêrdînî Hurşît Îmran û Fermandarê Cendirmeyan ê Kerboranî Mehmet Tîre zî tede derheqê 18 kesan de 'bi zanayîşî kiştişî' ra dewa ameye akerdene.

Dosyaya dewa de beyanê şahîdan û delîlê qîmî estê. Ma wazenê ke sûcdarî wa 2ê teşrîna peyêne de bêrê cezakerdene.''