Mayanê Haştîye bi wesîleya 1ê Êlule Roja Haştîye ya Dinya verê Qesra Dolmabahçe de eşkerayîye daye û çalakîya roniştişî kerde. Mayî dima raştê hêrişê polîsan ameyî. Mayî seba ke waştişanê xo yê haştîye vajê ameyî noqtaya stadê Beşîktaşî û waşt ke tecrîdê zîndanan biqedo û masaya çareserîye reyna bêra ronayene.

Mayanê Haştîye ra Akîme Keskîn îfade kerd ke rixmê qirkerdişan ê haştîye wazenê û vat: ''Wird hetan  ra zî gonîye rijîyena. Na mesele bi şerî çareser nêbena, ganî her kes ney hol bizano.''

Mayan ra Bedîa Gokgoz zî ard ziwan ke wa qirkerdiş û tecrîdî biqedê, cenazayî zîndanan ra nêvejîyê. Gokgoze vat: ''Wa mayê kurdî cenazayan zereyê tabutî de bigêrê. Cenaza nêmanda, esteyî danê ma. Ma ney qebul nêkenê. Wa masaya çareserîye reyna bêra ronayene.''

Qiseykerdişan ra dima polîsan hêrişê mayan kerd. Polîsan mayî erdî ra kaş kerdî û destbend kerdî, xebatkarê çapemenîye bi keyfî asteng kerdî.

Polîsan Bedîa Gozyuz, Zelîha Gokyuz û Şukrane Tugay destbend kerdî.