Meclîs de mesela Kirmanckî: Way Way Nînna

Wekîlê HDPyî yê Çewlîgî Erdal Aydemîrî meclîsî de Kirmanckî selam da û rastê nêrazîbîyayîşan ame. Aydemîrî zî bi vatişanê deyîra Rencber Ezîzî "Way Way nînna, ina nîya aya bîn a, şima vînên senîn a" nêrazîbîyayîşê xo mojna.

Wekîlê HDPyî yê Çewlîgî Erdal Aydemîrî seba ke bernameyêkê Tvyê Tirkan de kirmanckî ameye sansûrkerdene, ney protesto biko bi Kirmanckî selam da heyetê pêroyî yê meclîsî. Selamê kirmanckî yê Aydemîrî meclîs de rastê nêrazîbîyayîşan ame. Aydemîrî zî bi deyîra "Way Way Nînna" nêrazîbîyayîşê xo mojna.

Aydemîrî wexto ke dest pê qiseykerdişê xo kerdêne bi Kirmanckî selam da Meclîsî. Wekîlanê AKP û MHPyî nêrazîbîyayîşê xo mojna. Serekwekîlê Meclîsî Levent Gok o ke heyeto pêroyî îdare kerdêne mudaxeleyê Aydemîrî kerd.

Aydemîrî selamê xo ke da îfade kerd ke grûbanê AKP, MHP û CHPyî de zî wekîlê ke kirmanckî qisey kenê, estê û vat: "Ganî semedo ke ez bi kirmanckî selam dana, şima hende nêrazî mebê. ATVyî de bernameyê Muge Anli de hemwelatîyêkî bi kirmanckî qisey kerd û weşan ame vindarnayene. Aydemîrî  wina vat: “Wexto ke pêvînayîşê butçe yenê kerdene seba waştişanê tayê kesanê ke wazenê bi ziwanê dayîke perwerde bivîne butçe nêna amadekerdene, tewr zî ziwanê înan yenê redkerdene. Beno ke qiseykerdişê mi yê bi kirmanckî zabitnameyî de sey 'ziwano ke nêno zanayene' ca bigêro la ez nameyê her keso ke waştişê înan ê ziwanê dayîke esto ser o na rewşe şermezar kena."

Aydemîr qiseykerdişê xo ra dima bi vatişanê deyîra Rencber Ezîzî "Way Way nînna, ina nîya aya bîn a, şima vînên senîn a" nêrazîbîyayîşê xo mojna.

Serekwekîlê Grûba MHPyî Levent Bulbulî heqê qiseykerdişî girewt û tewirê Aydemîrî sey nîjadperestîye name kerd.

Serekwekîlê Grûba AKPyî Mehmet Muşî vist vîrî ke gore qanûnê bingeyênî ziwanê fermî tirkî yo û vat: "Eke şima tîya de tirkî ra ber bi ziwanêkî qisey bikê kam do fam biko? Kirmanckî zî kurmanckî zî zengînîyê ma yê. Naye ra kirmanckî zabitnameyî de sey ziwano ke nêno zanayene ca bigêra. Çunke ziwano fermî Tirkî yo. Merdimo ke beşdarê bernameyê Muge Anli bi, kirmanckî qisey biko zî çew fam nêkeno."

Serekwekîlê Grûba HDPyî Saruhan Oluçî vat: "Ganî kesêk zî vera naye nêvindero.  Vateyê nîjadperestîye nêno qebulkerdene. Seba ke şar bi ziwanê xo yo dayîke qisey biko ganî meclîs astengan wedaro."