Serekwezîrê Fransa Edouard Phîlîppeyî Meclîsê Neteweyî de cevab da persanê lîderê Têgêrayîşê Fransa yê Sere Çewtnêkerdayan  (LFI) Jean-Lûc-Melenchonî û dibare kerd ke ganî hêrişê Tirkîya bêrê vindertene.

Phîlîppeyî da zanayene ke leşkerê Fransa yê herême beno ke verba hêrişan qîm bimanê û mojna ke Tirkîya ganî peynîya hêrişanê xo bigêra. Phîllîppeyî hayîdar kerd ke hem aramîye do çin bibe em zî bibe sedem ke DAÎŞ newe ra çalakîyanê terorî bike. Phîlîppeyî vat têkilîya înan ê bi temsîlkaranê şarê Kurdî dewam kena û astengkerdişê vîndîyan bingeyê pêroyê pêvînayîşan ê înan ê. Phîlîppeyî bale ante serê qirkerdişanê ke yenê kerdene û vat, armancê înan astengkerdişê 'oyo tewr xirab' o.

Vernîyazê qerarêkî de zî ke pêşkêşê Senatoyê Fransa ame kerdene, yena waştene ke verba hêrişanê îşxalkarîye yê Tirkîya  pêroyê însîyatîfanê Ewropa ra yan zî wareyê mîyanneteweyî ra paşt bêro dayene. Goreyê vernîyazî ganî Fransa na babete de bi qerardarîye angajman bimojne. Vernîyaz hetê senatoranê Partîya Komargeran û Partîya Sosyalîste ra ame amadekerdene. Beşê semedî yê vernîyazê qerarî de hewceyo lezabez ê seba pawitişê sivîlan yeno vîrvistene û yena vatene ke ganî bi hewayêkê bêastengî hetkarîya merdimîye birese erdê Sûrîye. Vernîyaz de yena waştene ke pêroyê raameyîşê Sûrîye bêrê pawitene. Vengdayîşê derheqê vernîyazî de do 22'ê Teşrîna Verêne de Senato de bêro kerdene.