Rêxistinanê ciwanan bi şîarê 'Seba azadîya xo ma vera faşîzmî vejîyenê' bînaya Bagcilarî ya HDPyî de ronayîşê Meclîsê Yewbîyayeyî yê Ciwanan îlan kerd. Çalakîye de çar hetanê Îstanbulî ra ciwanî amade bîyî. Wekîlê HDPyî, Hemvervatoxê HDKyî, Hemserekê HDPyî yê Îstanbulî zî tewrê eşkerayîye bîyî.

Çalakîye de pankarta bi nuşteyê 'Seba azadîya xo ma vera faşîzmî vejîyenê' ameye akerdene û seba şehîdan deqayêk rêz ame girewtene.

Nameyê rêxistinan ser o Volkan Atmacayî qisey kerd û vat: ''Ganî ma wayîrê mîrasê xoverdayîşî vejîyayî. Ma azadî, têdûştî, edalet, têkoşîn û paştdayîşî ser o ameyî pêser. Ma seba ke dejanê bi hezaran serran derman bikerê dişmenî rê vajê 'vinderê' ameyî têhet.''

Vervatoxa HDKyî Îdîle Ugurlu zî qisey kerd û vat: ''Ewro seba ma rojêka girîng a çunke Seyîd Riza û embazê ci Meydanê Xarpêtî de ameybî dardekerdene. Hîşmendîya TCyî ya ke armenî, sûryan, misilmanî qetil kerdî nika kurdan qetil kena. Polîtîkaya qirkere her metod şuxilna û hema zî na polîtîka dewam kena.''

Wekîlê HDPyî yê Îstanbulî Musa Pîrogluyî zî vat: ''Îqtîdar ciwanan keno ajan, erzeno zîndanan. Ma vera nînan Rojawan de cewabêko tewr raşt da. Înanê ke pawitêne Kobanê bin bikewo dî ke têkoşîno yewbîyaye çi yo, çi dersan dano û ma teslîm nêbenê.''