Wekîlê DEPî Mehmet Sîncaro ke 4ê êlula 1993 de Êlih de pîya bi Metîn Ozdemîrî hêrişê çekdarî de ame qetilkerdene serê gorê ci de ame vîrardene.

Vîrardişo ke qezaya Qoserî ya Mêrdînî de serê gore Sancarî de ame kerdene Vervatoxa HDPyî Ebru Gunay û Wekîle Pero Dundar zî tede xeylêk kesî tewrê ci bîyî.

Cinîya Sîncarî Cîhane Sîncar vist vîrî ke Sîncar  û Metîn Ozdemîr hewteyê haştîye de ameyî qetilkerdene û vat: ''Êyê ke haştîye nêwazanê înan hêriş kerd. 28 serrî yo hema qetilkarî nêvejîyayî werte. No semedê meclîsî şerm o. Wezîrîya Edaletî xora têna nameyê ci edalet esto, ê semedê caardişê edaletî çîyêk nêkenê. Bedelê ci çi beno wa bibo ma do têkoşînê Mehmet û Metînî û bi mîlyonan erdî de nêverdê. Ma zanê ke qetilkar yew kes nîyo.''

Pero Dundar zî ard ziwan ke qetilkarî xora eşkera yê û vat: ''Înanê ke Mûsa Anter, Vedat Aydin, Mehmet Sîncar û Denîze Poyraz qetil kerdî pêro yew ê. Ma zanê qetilkarê ma kam ê. Qetdilkar no sîstem o.  Hinî bîyo ke keyeyo ke tede şehîd çîn o nêmendo.  Mehmet Sîncar semedê zelalkerdişê qetilkerdişan têgerayêne. Eke o wext qetikarî biameyêne dîyene, belka dewamê înan nêameyêne.  Ewro dewlete vana ke 17 hezar kesê ke nêzanîyeno hetê kamî ra ameyî kiştene estê. No îqtîdar hela ke ame, vat o do nê qirkerdişan safî bikero.  La ewro yew bi yew nê dosyayan qefilneno. Înanê ke vat ma do  çareser bikerê zî eynî çî kerd.  Înan Sûr, Cizîre û Nisêbîn de qirkerdişî kerdî. Qetilkarî bêcazatîye ra paştî genê.  Îqtîdar dişmenîya kurdan keno.  Dişmeno winayêno ke êyê ke kurdan qetil kenê înan rê serkewtiş wazeno. ''