Dewaya PKKyî ya ke avûkatanê dewleta tirke û dozgerêk berdbi temyîz ewro ameye kerdene. Roniştişo verên 14ê çeleyî de amebi kerdene û hetê tirkan ra seba pawitişî wext amebi waştene.

Mehkemeya dezgehê hukmkerdişî mutalaya roniştişê peyênî de eşkera kerdbi ke bira Mehkema Îstînafî ya derheqê PKKyî de musbet a.

Roniştişê diyînî de dozgerê dezgehê hukmkerdişî heqê qiseykerdişî nêgirewt. Goreyê çimeyanê ke nêzdîyê dewa yê no yeno a mana ke tewirê dozgerî dewam keno.

Avûkatê terefgîrê kurdan Jan Fermonî ANF reyde qisey kerd û ard ziwan ke Dezgehê Hukmkerdişî rojêke de eşkeno bira xo eşkera bikero. 

Teşrîna peyêna 2018î de Dîwanê Edaletî yê Ewropa yê Luksemburgî de argumanê mabênê serranê 2014-2017î de yê ke derheqê cagiretişê PKKyî yê lîsteya terorî de bîyî kêm dîbi û lîste batal kerdbi. Nameyê Yewîya Ewropa ser o Îngilîztan îtîrazê na bire kerdbi û PKK bi hawayêkê otomatîkî kewtbi lîsteya terorî. Adara 2019î de terefê kurdan seba lîsteya newîye muracat kerdbi.

Nêno zanayene ke Dezgehê Hukmkerdişî do waştişê dozgerê federalî biercno yan ney. Mehkemeyanê Belçîka seba PKKyî serranê peyênan de panc birî girewtbi.

Dewaya Belçîka

Tewr peyêne de Mehkemeya Îstînafî 8ê adara 2019î de derheqê di dewayan de panc birî dabi. Mehkeme dabi zanayene ke ''PKK hêzêko çekdarî yê bêdewletî yo''. Îtîrazê dewleta tirke ra dima 20ê adara 2019î de na bire ameye temyîzkerdene.

Dewaya Brukselî derheqê tehqîqatî de serra 2006î de amebî akerdene. 37 kesî û dezgehî amebî hukmkerdene. Di medyaya kurdan û Fîdane Dogan (Rojbîne) zî ameyebî hukmkerdene ke Dogane 9ê çeleyê 2013î de Parîs de ameyebî qetilkerdene.

Derheqê kurdêkê bi nameyê Faysal Doganî de zî heman dewa amebî akerdene. Çolak semedo ke tay hacetî berdî Başûrê Kurdîstanî û dayî PKKyî ameyêne hukmkerdene. Çolak wextêk zîndan de zî mend. Dima ke bire ameye dayene ke PKK rêxistinêka terorîste nîyo mehkeme da zaneyene ke  Çolak na çarçewe de do nêro hukmkerdene.