Unîversîteya Ozgurî ya Paytextê Belçika Bruksel de 5-6ê sibate de Mehkemaya Şaran a Rojawanî ameye kerdene. Qerarê mehkeme Parlamentoyê Ewropa de rayapêroyîye de ame parekerdene.

Parlamento  de eşkerayîya çapemenîye ameye kerdene. Heyetê mehkeme ke muhakemekerdiş kerd, dozgerî, avûkat, sîyasetmedarê kurdî û pawitoxê şarî tewrê eşkerayîye bîyî. Hemsereka Daîreyê Tekîlayanê Teberî yê Îdareyê Xoserî yê Rojawanî Îlhame Ehmed zî tewrê ci bîye.

Qerarê 80 pelen de cayê kanitan de hêrişanê vera waranê sîvîlan ê Rojawanî, îşkence, remnayîş, destbendkerdiş, bizorî erdê ci ra vetiş, hêrişanê kulturî û tarîxî ca girewt.

Qerar de derheqê sûcanê şerî û merdimîye,binpaykerdişê heqan û  berpirsîyarîye de analîzê huqûqî ameyî kerdene. Reyna derheqê tewirê komelê mîyanneteweyîyî erjnayîşî ameyî kerdene û pêşnîyazî ameyî kerdene.

Qerarê mehkeme de Serekkomerê Tirkîya Recep Tayyip Erdogan, Wezîrê Pawitişî Hulusi Akar, musteşarê MÎTî yê dewrî Hakan Fidan, Serekê Fermandarîya Pêroyîye yê demî Yaşar Guler, Fermandarê Hêzanê Erdî yê demî Umit Dundan sûcdar ameyî vînayene.

Qerar de wina ame vatene: ''Tirkîya 2016 ra nata vera Rojawanî hîrê operasyonê girdî kerdî (Firat Kalkani, Zeytin Dali, Bariş Pinari) û netîceya nê operasyonan de herêmanê Efrîn, Tel Abyad, Serekanîye û El- Babî de rewşêka îşxalî ya derge ameye pêardene. Nê çalakîyanê leşkerîyan de heqê bandûre yê Sûrîye ameyî binpaykerdene û haştîya mîyanneteweyîye ameye tehdîtkerdene.''

Sûcê dewleta tirke wina ameyî rêzkerdene: ''Nêweşxane, mektebî,binawanîya awe û hedefê bînî yê sîvîlî ameyî bombardumankerdene. Çekê kîmyewîyî ameyî şuxulnayene,vera sîvîlan înfazê keyfî, remnayîş, îşkence û vînkerdişî ameyî kerdene.''

Heyetê Mehkemeya Şaran a Rojawanî waşt wa nê gemî bêrê eştene: ''Wa zextê mîyanneteweyîyî bizêdîyo ke Tirkîya wa Rojawan de îşxalê xo biqedîno û herême ra bivejo. Wa selahîyetdarê Tirkîya Mehkemeya Ceza ya Mîyanneteweyîye de bêrê muhakemekerdene. Semedê cigêrayîşê binpaykerdişê heqanê merdiman ê Rojawanî wa komîsyonêk bêro ronayene.''

Peynî de ame vatene ke no qerar semedê pawitişê huqûqê mîyanneteweyîyî vengdayîşêk o û ame waştene ke semedê caardişê huqûqê mîyanneteweyîyî wa cade game bêro eştene.