Mehkemeye, mucadeleyê Vakûrê Kurdîstanî yê PKK’yî qerar da ci û sey “Pênêkerdişê zereyê Tirkîya” dî, la Dozgerîya Federalî ya Belçîka îtîraz kerd. Îtîraz vizêr mehkemeye de ame dîyayene.

Mehkemeya Temyîzî seba ke faalîyetê PKK’yî faalîyetê terorî nêdî, hemserekê KONGRA-Gel Remzî Kartal, endamê Konseya Rayberdişî yê KCK’yî Zubeyîr Aydar zî  tede derheqê 37 sîyasetmedaranê Kurdan de qerar da ci ke ê do nêrê mehkemekerdene.

Bi nê qerarî, dewaya ke serra 2006’î de hetê Dozgerîya Federalî ya Belçîka ra, seba rayîrberanê PKK’yî ameybî akerdene betal bîye.

Yew heqê îtîrazê Dozgerê Federalî yo peyên zî esto.

Eynî mehkeme serra 2017’î de PKK sey “rêxistino çekdar o mîyanneteweyî yo ke dewleta ci çin a” name kerdbi.

Mehkemeye bale ante şîdetê dewleta Tirkî ser û va PKK vera nê şîdetî vejîno û meydan de faalîyetê terorî çin ê.

Goreyê nê qerarî, PKK Belçîka de bi qanûnanê terorî do nêro mehkemekerdene.

Belçîka de, serra 2006’î de Remzî Kartal, Zubeyîr Aydar û Adem Uzun zî tede derheqê 36 sîyasetmedaranê Kurdan de tehqîqat amebi destpêkerdene.

Serra 2016’î de zî Daîreya Persayîşî ya Brukselî qerar da ci ke PKK rêxistinêko terorî nîyo û dewa red kerde.

Dozgerê Federalî nê qerarê mahkemeyî rê îtîraz kerd.

Seba ke PKK, “Lîsteya rêxistinanê terorîyan ê YA” ra bivejîyo, dewa ameyebî akerdene û dewa 16’ê Nîsane 2018’î de Dîwanê Edaletî yê Ewropa de ameyebî dîyayene.

Dîwanê Edaletî zî lîsteya rêxistinanê terorîyan de bîyayena PKK’yî sey nêheqîye dîye.