Wekîlê HDPyî yê Kocaelî û Endamê Komîsyonê Teqîbê Heqanê Merdiman ê Meclîsî Omer Faruk Gergerlîogluyî grevê vêşanîye yê tepişteyan û binpaykerdişê heqan ANFyî rê ercnayî.

Gergerlîogluyî pare kerd ke dewlete meseleya kurdan zêdêr mîyan  kena û vat: ''Meseleya kurdan seserran ra nata esta. Dewlete na mesele 40-50 serrî yo bêçareserîye verdaye. Merdimê ke vera naye weriştî ra tepişîyenê. Nê merdimî seba ke tecrîd biqedo dest pê grevê vêşanîye kenê. Na rewşe tm wina xo dibare kena. Ganî dewlete na babete de gamêke bierza. Merdimî mirenê, şaristanî vêşîyenê û ekonomîya welatî rijîyena. Nê prosesî de pere dîyeno çekan, bi hezaran merdimî zîndanan de tepişîyenê. ''

Gergerlîogluyî grevê vêşanîye yê serra 2018î vist vîrî û vat: ''Ê grevî de zî heyf ke tay kesan dinyaya xo bedilnaye. Aya ke yena kerdene raşta zî çalakîyêka girîng a. Tepişteyî seba ke meseleya kurdan çareser biba, tecrîdê Îmraliyî wedarîyo û atmosferê dîyalogan bêro awankerdene grev kenê. Tepişteyê kurdî nika xoverdayîşêkê pîlî kenê. Ma na rewşe bi qesawetî teqîb kenê.''

Gergerlîogluyî ard ziwan ke ê zîndanan nêzdî ra teqîb kenê û vat: ''Parlamentero ke tewr zaf waştişname dayo Wezaretê Edaletî û Komîsyonê Heqanê Merdiman ez a. Herinda Wezaretê Edaletî de ma binpaykerdişanê heqanê tepişteyan, meseleyanê merdimanê tepişteyan danê zanayene. Mekanîzmayêka dewlete esta ke bi hawayêkê kolektîfî xîret kena ke binpaykerdişan binimna. Mi nêzdîyê 2 hezar vernîyazî dayî Wezaretê Edaletî la cewab nêdîya înan. Mi nêzdîyê 3 hezar waştişnameyî dayî Komîsyonê Heqanê Merdimano ke binê kontrolê Îtîfaqê Cumhurî de yo la înan nê waştişnameyî 'nêdîyî.' Bêguman ma do rayîrê xo ra nêagêrê.''

Gergerlîogluyî ard ziwan ke ê do Meclîs de kombîyayîşê çapemenîye bikerê û rewşa zîndanan rayaumûmîye reyde pare bikerê. Gergerlîogluyî vat: ''ma xîret kenê ke na meseleyan bivisnê rojdemî. Nika mîyanê tecrîdî de tecrîd esto, grevê vêşanîye dewam keno û merdimî verê mergî de yê. Ma pê hêvîdar ê ke serra 2021î de gamê zêdêr bitesîrî do bierzîyê. Îqtîdar wayîrê nîyetê xirabî yo la nîyetê ma hol o. Seba qedînayîşê grevê vêşanîye û wedaritişê tecrîdê Îmraliyî ma do gaman bierzê.''