Mabênê 19-25ê kanûna 1978î de Mereş de vera elewîyan, kurdan, çepgîran qirkerdişêk ame kerdene û netîceya nê qirkerdişî de bi seyan kesan dinyaya xo bedilnaye û bi hezaran kesî birîndar bîyî, bi seyan kargeh û keyeyî ameyî xerakerdene. Êyê ke xelisîyayî neçare mendî ke koç bikerê. Bi wesîleya serrgêra ci ya 43. ya Qirkerdişê Mereşî Cemxaneyê taxa Yoruk Selîmî ya Mereşî de  aktîvîteya yadkerdişî ameye organîzekerdene.

Serekê Komeleya Kulturî ya Pîr Sultan Abdalî Ganî Kaplan, Serekê Komeleyanê Kulturê Eleweîyan  Îsmet Kurd, Serekê Pêroyî yê Waqfê Kulturî yê Haci Bektaşî Velî yê Anadolu Ercan Geçmez, Serekê Pêroyî yê Federasyonê Elewî Bektaşî Celal Firat, Serekê Pêroyî yê Komeleyanê Elewîyanê Demokratîkan Musa Kulu, Hemserekê Konfederasyonê Sendîkayanê Kedkaranê Umûmîye Mehmet Bozgeyîk, Wekîlê HDPyî Zeynel Ozen, Kemal Bulbul, endamê meclîsê partîye Neimi Aday û bi seyan kesan tewrê aktîvîte bîyî.

Şar hetê polîsan ra gerîya binê ablûqa û dima ke hîrê nuqtayanê kontrolî ravêrt resa Cemxaneyê Erenlerî. Yadkerdiş rixmê qerarê qedexeyî yê walîtîye bi rayraşîyayîşî dest pêkerd. Çalakîye de ame vatene ke ê do xo vîr a mekerê, medê vîrakerdene û hesabê qirkerdişî bipersê. Yadkerdiş bi rêzgirewtişî dest pêkerd û badê qiseykerdişê akerdişî semah ame girewtene.

Zeynel Ozenî ke tîya qisey kerd vist vîrî ke 43 serran de çîyêk nêbedilya hema zî her roje elewîyan rê hêriş yeno kerdene û vat: ''Seba ke ma Qirkerdişê Mereşî dir bêro têrî ma tîya de yê. Hema cayê goranê ma bewlî nîyê. Derbê Mereşî ra hema gonî yena. Ma do qet yew qirkerdişî xo vîr a mekerê û hesabê înan bipersê.''

Mehmet Bozgeyik zî bale ante polîtîkayan bêcezaverdayîşê ye vera qirkerdişan ser û  vat ganî vera nê zîhnîyetê qirkerî tekoşîno hempar bêro kerdene.

Bi nameyê dezgehanê elewîyan ê Ewropa Huseyîn Matî qisey kerd. Matî vat: ''Şima ma qetil kerdî la nêresayî amancê xo. Şima do peynî ra tewr peynî estbîyayîşê ma qebul bikerê. Pê înkarî şima nêresenê cayêkî. Polîsanê ke dormeyê ma girewto ra ma nêtersenê. Ma wazenê nasnameyê xo biciwîyê. Elewîyî hinî rêxitinkerde yê.  Ma do hesab bipersê.''

Bi nameyê dezgehanê elewîyan ê welatî zî Huseyîn Guzelgulî qisey kerd. Guzelgulî vat: ''Ma Kerbela, Sêwas û Mereşî roja îneyî ciwîyayî. Merdimî bi hewayêkê wehşî ameyî qetilkerdene. Heta ke qirkerdişî dir nêro têrî ma tîya de yê.  Bi qedexekerdişê yadkerdişî wazenê ma rê bidê vîrakerdene. Ma do xo vîr a mekerê, medê vîrakerdene.''

Badê qiseykerdişan semedê kesanê ke ameyî qetilkerdene mumî ameyî tafînayene û vilikî ameyî ronayene. Yadkerdiş bi vilakerdişê lokmayan qedîya.