Zîndananê Tirkîya de mîyanê mengêke de 7 tepişteyan Bangîn Muhammed, Garîbe Gezer, Abdulrezak Suyur, Halîl Guneş, Salîh Tugrul, Ilyas Demîr û Vedat Erkmen bi hawayêkê şikdarî dinyaya xo bedilnaye.

Nê mergan ra dima rewşa tepişteyanê nêweşan reyna bîye rojdem. Goreyê raporê Komeleya Heqanê Merdiman (ÎHD) zîndanan de 605 tepişteyê nêweşî estê ke rewşa 604ê înan giran a. Goreyê heman raporî serra 2020î ra nata 64 tepişteyanê nêweşan zî dinyaya xo bedilnaye.

Cengîz Sînan Halîs Çelîko tepişte zî hem nêweşê kanserî hem zî nêweşê epîlepsî yo û bi bananeya KOvîd-19î tedawîya ci ameye vindarnayene.

Nesrîne Çelîka ke waya tepişteyê nêweşî Cengîz Sînan Halîs Çelîkî ya derheqê rewşa birayê xo de ANFyî rê qisey kerd.

Nesrîne vat: ''Birayê mi 25 serrî yo tepişte yo. Nika Zîndanê Sîlîvrî de yo û tede kanserê mesane û epîlepsî esto. Kiştoxê Ozgecane Aslan zî rehabîlîtasyonê Zîndanê Metrîsî de birayê mi 22 caran ra kardî kerd. Birayê mi bi xo terapî û fîzyoterapîya xo keno. Wextê Korona de tedawîya ci nêamebî kerdene. Doktorî zî dewaya ci ra bi hawayêkê xirabî nêzdîyê ey benê. Nê narkozî o amelîyet bîyo. Birayê mi nika Zîndanê Sîlîvrî de yo û nêeşkeno bi xo hewcedarîyanê xo peyda bikero. Nika kanserê ci asta kamca de yo ma nêzanenê.''

Çelîke Garîbe Gezer viste vîrî û vat: ''Mergê Garîbe Gezer şermê ma yê pêroyînan o. Zîndanan de kesêk zî bimiro şermê ma yo. Wa kes dewlete ra çîyêk nêpawo. Xora dewlete ney kena. Ganî ma, rêxistinê komelê sivîlî meverdê ke tepişteyê nêweşî rojdemî ra bikewê.''