Goreyê tespîtanê ÎHDyî 651ê nan bi giranî  517 hezar tepişteyê nêweşî est ê. Rixmê rewşa girane ya tepişteyan raporê eşkenê zîndan de bimanê yenê dayene û zîndanan de têdima şehadetî qewimîyenê. Reyna goreyê doneyanê ÎHDyî 2022 de 47 tepişteyan zîndan de dinayaya xo bedilnaye. Hewteyo ravêrte de tepişteyê nêweşî Îbrahîm Yildirim, Mehmet Candemîr û Bazo Yilmaz û tepişteyêko nameyê ci nîno zanayene dinyaya xo bedilnaye.

Endama Heyetê Rayberdişî yê Merkezê ÎHDyî Nuraye Çevîrmen rewşa tepişteyanê nêweşan ANFyî rê ercna.

Nuraye Çevîrmen vat: ''Ma sey komeleya heqanê merdiman falîyetê ma zaf zîndanan ser ê. Ma aşma nîsane de derheqê binpaykerdişanê heqan ê zîndanan de raporêk pare kerd. Goreyê nê raporî 651ê nan bi giranî  517 hezar tepişteyê nêweşî est ê. Ma waşt ke wa nêweşê giranî bêrê veradayene ê û tepişteyê bînî bêrê dermankerdene. Reyna ma watş wa tepişteyî pê wesayîtanê zîndanê sewqê nêweşxane mebê, tedawîya înan pê kelemçeyan nêro kerdene, sewqî lezabez bêrê kerdene û tetîkî erey mekewê.''

Nuraye Çevîrmen bale ante qeraranê sîyasîyan ê Dezgehê Tibê Edlîyî ser û vat: ''Ma tespît kerd ke têna 8 aşmanê na serre de 47 tepişteyan dinyaya xo bedilnaye. Xora mergê ke xebera ma tira çîna zî qewimîyenê. Nê hewteyê peyênî di tepişteyan rîyê krîzê qelbî ra di tepişteyan zî rîyê nêweşîya girane ra dinyaya xo bedilnaye. Tepişteyê nêweşî yê ke nêeşkenê zîndan de bimanê est ê û nê yew bi yew mirenî. Reyna xeylêk tepişteyê extîyar û astengdarî zî est ê ke nêeşkenê têna miqatê xo bibî. Raşta zî eyb o ke tepişteyê nêweşê giranî zîndan de yenê tepiştene.

Dezgehê Tibê Edlîyî qeraranê sîyasîyan geno. Rîyê nê qeraran ra tepişteyî rixmê rewşa xo ya girane zîndan de yenê tepiştene û mirenî. Verê nê mergan eşkeno bêro girewtene. La heqê cuye werte ra yeno wedaritene û verê nê mergan nîno girewene. Qedexeyê îşkenceyî yeno binpaykerdene. Bi vatişê kilmî no sûcê merdimîye yo. Ganî nê binpaykerdişê heqan bêrê qedînayene, tepişteyê nêweşî cade bêrê tehlîyekerdene û înfazî bêrê peydeeştene.''