Hemserekê Pêroyî ya DEM Partî Tulaye Hatimogullari bi wesîleya 8ê Adare Roja Cinîyan ê Kedkaran a Dinya meclîs de kombîyayîşê grûba cinîyan kerd. Hatimogullari cinîyê tepişteyî selam kerdî û polîtîkayê îqtîdarî yê vera cinîyan şermezar kerdî.

Hatimogullari waşt wa Pêkerdişê Îstanbulî cade peyser bêro û nê vatî: ''Gerek cade zextê vera cinîyan ê tepişteyan bêrê vindarnayene. Bi qeyûman îradeyê cinîyan yeno xespkerdene. Cinîyî sîyaset û îdareyê herêmî ra yenê dûrfînayene. Nê qeyûmî do şirê cinî û şar bimanê. Ma do 8ê adare vejîye waran û vera zextan wayîrê heqanê xo bivejê.''

Mesajê Rayber Apoyî

Tulaye Hatimogullari vengdayîşê Rayber Apoyî yê 27ê sibate vîst vîrî û nê vatî: ''Nê pêvînayîşî de Birêz Ocalan no zaf eşkera vat: 'Şîfreyo bingeyî yê demê neweyî têkoşînê demokratîkbîyayîş o. Kerdoxo şorişgêr ê têkoşînê demokratîkbîyayîşî cinî yê. Şerto verên ê demokratîkbîyayîşî, şorişgêr û soyalîstbîyayîşî bi waştişê azadîye nizdîbîyayîşî meseleya cinîyan o. Ma do pîya bi cinîyan ê ke raştê zextê tewr xorî yê tarîxî ameyî, têkoşînê xo yê seyyewbînîye,azadîye û demokrasîyî tacîdar bikerê.' Birêz Abdullah Ocalanî bale ante muhîmîya têkoşînê azadîye yê cinîyan ser cinîyan rê selam û hurmetê xo şawtî

27ê sibata 2025î de pêro dinya hela tarîxî rê şahîdîye kerd. Birêz Ocalanî bi vengdayîşê demokratîk û haştîye berê haştîye akerdî. Nê vengdayîşî bêrê zemînê tewr hêzdarî yê haştîye û çareserî yê seserre akerde. Hinî demê tersan, qesawetan û sendroman nîyo, wextê demokrasî, haştîye, edalet û azadîyan o. Muxatabê nê manîfestoyî têna PKK nîyo, eynî wextî de dewlet a, îqtîdar û komel ê, pêro muxalefet o.  Muxatabanê tewr girdan ra yew zî parlamentoyê nê meclîsî yo. Meclîs gerek cade rolo tarîxî bigîro xo ser.

Herême, Tirkîya û dinya ra paştdayîşo ke dîya nê vengdayîşî tarîx de zaf tay ameyo vînayene. PKKyî zî eşkera kerd ke vengdayîşê Birêz Ocalanî qebûl keno û adirbirnayîş îlan kerd û hêvîya ma ya haştîye gird kerde. Seba ke na hêvî bibo mendî gerek cade zemînê kongre bêrê hazirkerdene. Gerek cade operasyonê teberê sînorî bêrê vindarnayene. Birêz Erdogan wayîrê nê prosesî vejîya no zaf muhîm o la semedê haştîye vate qîm nêkeno, gerek çalakî û îcraat bibo.

Birêz Abdullah Ocalanî pêvînayîş de vateyêko zaf rind şuxulna: 'Demokrasî hunero ke merdimî bi hewayêkê azadî fekê xo akenê.' Hinî Tirkîya de wextê qiseykerdişî yo. Senî ke Selahattin Demîrtaşî yê erjîyayeyî zî vat wextê ci yo ke dalpayêka awe bidîyo dara haştîye.

Dayîkê haştîye yê ke bi têkoşînê xo yê bi des serran bezre kerd leye û ma dormeyê dara haştîye ya girde de ardî têhet, dayîkanê ke bedelê tewr girdî dayî  ez înan rê hurmetê xo şawena. Wayîrê tewr pîlî yê prosesî şima yê, dayîkê haştîye yê. Wayîrê nê prosesî cinîyê kedkar ê ke bedelê girdî dayî.

Ma do pêro pîya 8ê Adare de do semedê wayîrvejîyayîşê heqanê xo vejîyê waran. Ma do 8ê Adare de wayîrê vengdayîşê Birêz Abdullah Ocalanî bivejê. Ma do Newroze de zî adirê Newroze semedê haştîye û komelê demokratîkî pêro pîya gir bikerê.''