Wekîlê HDPyî yê Dêrsimî Alîcan Onluyî bi vernîyazêkê persî meseleyê qezaya Pilemurîye berdî Meclîsî. Onluyî waşt ke Wezîrê Karanê Zereyî Suleyman Soylu wa cewab bido persanê vernîyazî. 

Alîcan Onluyî eşkera kerd ke dewa Kulluyî ya Pilemurîye de dormeyê qereqolê cendirmeyan pê mayinan ame girewtene û dormeyê nê cayê mayininî de ne dêsî ne zî barîyerî estê. Onluyî da zanayene ke ger roje heywanî nê mayinan ra telef benê û dewijî raştê tehlukeyan yenê. 

Onluyî vat: ''Seba ke vera mayinan tedbîrî nênê girewtene dewe de tehlukeyêko pîl esto. Qaşo muracatan ra dima qereqolî îhaleyêke daye destpêkerdene la hema prosesê îhale eşkera nêbi. Reyna dewanê Kuzulca, Elmali, Taşlik û deweka Çorsî de meseleya resayî esta. Seba ke rayîrî xirab ê merdimî rayîrê Erzirom-Erzinganî şuxilnenê. Dewijî wazenê ke mabênê Elmali û Kuzulca de pirdêk bêro viraştene.''
 

Onluyî vernîyazê xo de nê persî persayî:

-Raşt o ke dewa Kulluyî de dormeyê qereqolî pê mayinan girewte yo û tedbîrî nêameyî girewtene? 

-Seba ke tedbîrî bêrê girewtene şima do têbigêrê?

-Çira muracatanê dewijan ser o nêno vindertene?

-Seba dewijanê ke heywanê înan telef bîyê şima do xebatêke bikerê?

-Çira meseleya resayî yê dewan nêna çareserkerdene?