Wekîlê HDPyî yê Dêrsimî Alîcan Onluyî derheqê hukmdarê Qirkerdişê Sêwazî Ahmet Turan Kiliço ke bi îmzaya Erdoganî ame veradayene de meclîsî rê vernîyazê persî da ke Hetkarê Serekkomarî Fuat Oktay cewab bido ci.

Vernîyazê persî de nê îfadeyî ca gênê:

''Cezaya Ahmet Turan Kiliço ke hukmdarê Qirkerdişê Sêwazî yo hetê Serekkomar Recep Tayyîp Erdoganî ra ameye wedaritene. Dima ke cezaya dardekerdişî amebî wedaritene cezaya Kiliçî vurîyaye cezaya muebede. Bire Rojnameyê Resmîyî de weşanaye Ahmet Turan Kiliç ame veradayene.

Zîndanan de zaf tepişteyê nêweşî estê la Ahmet Turan Kiliço ke mesuldarê Qirkeridişê Sêwazî yo ke Otêla Madimakî de 33 kesî bi vêşnayî, hetê Serekkomarî ra ame veradayene. Na bire hîsê edaletî yê komelî çin kerd. Seke yeno zanayene dewayê tay hukmdaranê Qirkerdişê Sêwazî zî verê cû derbazbîyayîşê wextî ra ameybî batalkerdene. Serekkomarê Erdoganî o çax zî seba na bire vatbi 'Wa xêr bo'.

Onluyî vernîyazê persî de Hetkarê Serekkomarî Fuat Aktayî rê nê persî persayî:

-Semed û krîterê veradayîşê mesuldarê Qirkerdişê Sêwazî Ahmet Turan Kiliçî çî yê? Şima fikirîyenê ke efûkerdişê nê kesanê ke vera merdimîye suc kerd wijdanê komelî defneno?

-Wextêk de ke zîndanan de nêweşê giranî estî bira veradayîşê Ahmet Turan Kiliçî birêka sîyasî ya?

-Raporê veradayîşê Kiliçî de nêweşîyêka girane ra yena qalkerdene? Şima do nê raporî eşkera bikerê?
-Nika çend hukmdarê Qirkerdişê Sêwazî zîndan de yê? Înan ra kesêkî seba efû muracat kerd?

-Wextê serekkomarîya Erdoganî de çend tepişteyan seba efû muracat kerd?

-Kesê ke hetê Erdoganî ra ameyî efûkerdene kamyew semedan ra ameybî tepiştene?