Paytextê Almanya Berlin de serkêşîya dezgehanê heqanê merdiman û rêxistinanê huqûqnasan de bi nameyê 'Qedexeyê Serê PKKyî yo 28 serre: Ma nika qisey kenê' forumêkê di rojan do yeno kerdene. Mexdûranê qedexeyî ke roja verên a forumî de qisey kerd, vat serê înan ra mesajê danê kurdanê bînan.

Zafê mexdûranê ke bajarê xo caverdayî online tewrê forumî bîyî. Rosa Karayîgîta ke Nurnbergî ra tewr bîye vat: ''Ez 2002î ra nata sey multecîya sîyasîye Almanya de ya. Seba ke ez şîya komale raştê zextan ameya. 15 serrî yo ez roja dişemeyî îmza erzena. Heqê roniştişê qicanê mi ame betalkerdene û ame waştêne ê bêrê tebersinorkerdene. Nas û dostê ma zî ameyî tehdîtkerdene ke mi ra bikewê dûrî. Serê mi ra mesaj danê kurdanê bînan ê ke tîya de yê. Coka na têna meseleya mi nê ya heme welatperweran a.''

Dima ra Heilbronnî ra Saît Ozturk, Huseyîn Kelekçî, Huseyîn Ozkur û Yusuf Şerbet  ê ke heme heqê înan destê ra ameyî girewtene, nêeşkenê vejî teberê  bajarî û hewte de yew rey îmza erzenê, ameyî goştarî kerdene. Saît Ozturkî vat: ''Seba ke ez xebatkara Ozgur Polîtîka ya pasaportê mi destê mi ra girewt. Heme gureyê ke mi kerdî ci rê mudaxale ame kerdene. Qicê mi pê zorî şawîtî Konsolosxanê Tirkî ke wa hemwelatîyê tirkî bê. Ma semedê demokrasî ameyî Almanya la bê mergî ferqê tîya û cayo ke ez ameya çîn o.'' Reyna mexdûranê bînan zî problemê winayên ardî ziwan.

Bahattîn Dogano ke Mannheimî ra tewrê forumî bi ard ziwan ke kurdî seba ke bê nasname yê yenê cezakerdene û vat: ''Ma zulmî ra remayî ameyî la tîya zulm dewam keno. Polîtîkaya zextî ya yena rayraberdene. Ganî ez cayê xo ra meleqî, falîyetê sîyasîyî qedexe yê. Kênaya mi tersê peyser şawitişî ra bi serran nêşîye mekteb û psîkolîya ci xeribîyaye. Polîtîkaya qirkerdişî ya vera kurdan têna Tirkîya de nê her ca de yena rayraberdene. Ganî ma zî vera nê zextan xover bidê.''

Hemserekê Fed-Kurdî  Kerem Gok zî zextê ke Dresden dî dîye qalê ci kerd. Gokî ard ziwan ke heme aktîvîteyê bitestûrê ke o tewrê ci bîyo semedê înan cirê cipersayîş ame akerdene û vat Almanya sebebê ke pê heqê roniştişî da ma nika nê sebaban ra ma mûhakeme kena. Ma do çirey çok medê.''

Forum de temsîlkaranê dezgehanê kurdan ê ke mexdûrê sîyasetê krîmînalîzasyonî yê, înan zî qisey kerd. Mudirê Pêroyî yê Weşanxaneyê Mezopotamya û Mîr Muzîk ê ke ameyî qefilnayene, Alî Kayayî vat: ''Almanya tim ma rê zext kena verê karê ma gena. Her sereştişî de dest nana heme arşîvê ma ser û heme malzemeyê teknîkî gena. Ma mecbur newe ra vernî ra dest pêkenê.'' Hemserekanê verênan ê NAV-DEMî ra Tahir Koçer û bi nameyê Meclîsê Cinîyan ê Êzidîyan (NAV-YEK) Nujiyan Gunay zî qalê neheqayîya ke raştê ci yenê kerd.

Reyna enternasyonalîstê ke hedefê  yewîyanê asayîşê almanî de yê înan zî problemê xo ardî ziwan. Enternasyonalîstan vat seba ke ê paştî danê têkoşînê heqdarî yê kurdan raştê zextan yenê.