Kampa Multecîyan a Mexmûrî de serkêşîya Meclîsê Îştarî de û Kampa Lavrioyî ya Yunanîstanî de zî hetê Têgêrayîşê Cinîyan ê Kurdîstanî yê Ewropa (TJK-E) û Merkezê Kulturê Kurdîstanî ra grêve vêşanîye ke semedê wedaritişê tecrîdê serê Rayberê Şarê Kurdî Abdullah Ocalanî û paştdayîşê xoverdayoxanê zîndanan ameyênê kerdene vizêr bi çalakîyan ameyî qedînayene.

Mexmûrde  roja 176ine ya çalakîye de bi rayraşîyayîşêk ame kerdene. Bi hezaran kesê ke verê Dezgehê Keyeyanê Şehîdan de ameyî têhet bi slogananê xoverdayîşî heta verê Temsîlkarîya Neteweyanê Yewbîyayeyan rayra şîyî. Tîya Hemserekê Meclîsê Şarî yê Memxûrî Pakîstan Bîlenî qisey kerd. Bîlenî bale ante ser ke dişmen heme cayanê Kurdîstanî de kesanê ke serkêşîya têkoşînî kenê hedef geno û vat: ''Wazenê bi şiknayîşê îradeyê şarê kurdî, kurdan çîn bikerê. La wa bêro zanayene ke ma pê şehîdanê xo xurtêr benê.''Bîlenî vist vîrî ke grevê vêşanîye yê zîndanna ame qedinayene û vat coka ê zî çalakîya xo qedînenê û têkoşînê rê bi çalakîyanê cîyayan dewam kenê.

Kampa Lavrioyî de zî roja 259ine ya çalakîye de grevê vêşanîye bi çalakîyêke ameye qedînayene. Çalakîyê de pankartê sey ''Bimiro xayînîye'' û ''Biciwîyo xoverdayîşê zîndanan''ameyî akerdene bi sloganan tecrîd, hêrişê îşxalî û xayînîye ameyî şermezarkerdene. Rayraşîyayîş de Endamê Komîteya Keyeyanê Şehîdan a PKKyî Yasîn Bulut zî ame yadkerdene. Sîyasetmedar Huseyîn Arasanî ke çalakîye de qisey kerd vat çalakîya embazanê înan resaye amance xo û ê do heta azadîye Ocalanî têkoşînî rê dewam bikerê.