Avûkatê Buroyê Huqûqî yê Asrinî Serbat Kokluyî derheqê tecrîdê vera Rayberê Şarê Kurdî Abdullah Ocalanî de ANfyî rê qisey kerd.

Kokluyî îfade kerd ke Zîndanê Îmraliyî têna binê kontrolê Tirkîya de nê binê kontrolê huqûqê mîyanneteweyî de ya. Kokluyî vat: ''Coka heqê Mehkmeya Heqanê Merdiman a Ewropa (MHME), Komîteya Vergirewtişê Îşkeceyî ya Konseya Ewropa (CPT) û Neteweyanê Yewbîyayeyan esto ke Îmrali kontrol bikerê. Sebebêko pîl ê nê tecrîdî nêzdîbîyayîşê nê dezgehan o. CPTyî raporê xo de pare kerdbi ke Zîndanê Îmraliyî de îşkence esto û ganî tepişteyî avûkat û keyeyanê xo bivînê la dima peyê nê raporê xo de nêvindert.

Avûkat Kokluyî pare kerd ke Tirkîya Ewropa ra cesaret gêna û vat: ''27ê temmuza 2011î ra nata mîyanê 10 serran de Îmrali de têna panc reyî pêvînayîşê avûkatan ameyî kerdene. operasyonê cidîyî ameyî kerdene, avûkatî tepişîyayî. O çax ma muracatê MHME kerd. MHME tay dosyayan mîyanê di serranê de yan zî tewr zaf 7 serran de bi netîce kena la dosyaya serê tecrîdê Îmraliyî 10 serrî yo vindarnena. Xora sîstemê tecrîdî yê Îmraliyî konseptêko mîyanneteweyî yo le Yewîya Ewropa, Konseya Ewropa û NATOyî qey Tirkîya viraşto.

Ma nê tecrîdî sey 'Sîstemê Tecrîdî yê Îmraliyî' pênase kenê.Çunke no sîstem hînî pêro Tirkîya de esto. Zîndanê bi Tîpê Fyî verî Îmrali de ame caardene, rejîmê înfazî yê muebeda girane zî verî Îmrali de kewt dewre. Qanûnê Înfazî, TMK, krîterê ceza  pêro 1ê nîsana 2005î de bi nameyê 'Qanûnanê Ocalanî' ameyî amadekerdene û. Îmrali laboratuwar o. Nêzdîbîyayîşê bi meseleya kurdan pê tecrîdê Îmraliyî eşkera beno. Ma eşkenê vajê ke no tecrîd pêro welatî ra vila bîyo. PÊro çareserîyê meseleyanê welatî têna pê çareserîya meseleya kurdan mumkîn ê. No tewirê Birêz Ocalanî yo ke 23 serrî yo Îmrali de awan kerdo.''