Dayîreyê Berzî yê MHME dosyaya wekîlanê HDPyî de ke bi muracatê Hemserekê verênî yê HDPyî Selahattîn Demîrtaşî de bibi yew, bira serê Demîrtaşî kanûna 2020î de eşkera kerdbî.

Dayîreyê Berzî yê MHME bira xo ya serê wekîlanê bînanê ke 4ê teşrîna peyêne ya 2016î de tepişîyabî eşkera kerde û bire daye ke muhakemebîyayîşê înan de xeylêk madeyî ameyê binpaykerdene.

MHME bira yewkerdişê dosyayan daye û hukm da ke madeyê azadîya fikran, heqê asayîşî û azadîye, muhakemekerdişê meqûlî, astengkerdişê xoresnayîşê dosya ameyê binpaykerdene. Mehkeme da bira serê Demîrtaşî viste vîrî û vat: ''Seba wekîlanê ke azadîye ra bêpar verdîyayê, ganî hukmat tedbîranê hewceyan bigêro.''

Mehkeme bire daye ke tazmînatê 16 hezar euroyî bêro dayene Nursele Aydogan, Ayhan Bîlgen û Leyla Bîrlîk.

4ê teşrîna peyêne ya 2016î de verî Hemserekê HDPyî Fîgene Yuksekdag û Selahattîn Demîrtaş dima zî wekîlî Îdrîs Baluken, Selma Irmak, Leyla Bîrlîk, Gulsere Yildirim, Abdullah Zeydan, Ferhat Encu, Nîhat Akdogan û Nursele Aydogan ameybî tepiştene.

11ê kanûna 2016î de Serekwekîla Koma HDPyî Çaglare Demîrel û Wekîle Besîme Konca, 19ê nîsana 2017î de zî wekîle Burcuye Çelîk Ozkan ameybî tepiştene.