Mîkaîl Aslanî vera muracatê wedaritişê heykel û nameyê Seyîd Rizayî nêrazîbîyayîşê xo mojna û vat: "Ne Perînçek ne zî rîyakarê ke mîyanê ma de yê nêeşkenê na roşnîya raştîye ya ke şewq dana hewne bika. Seyîd Riza roşnîya seserra beriqîyaye yo."
Hunermendo dêrsimij Mîkaîl Aslanî derheqê muracatê Partîya Vatanî ya ke wazenê heykel û nameyê Seyît Rizayî bêrê wedaritene de hesabanê xo yê medyaya komelkîye ser o eşkerayîyêk daye.
Mîkaîl Aslanî pare kerd ke rayêk babîyê xo ra persa ke çira gorêkê Seyîd Rizayî çin o û cewabê babîyê xo taqîbkerdoxanê xo reyde pare kerd: "Babîyê mi wina cewab da: hukmatî vato ke Êke gorêkê Seyîd Rizayî bibo serê ci de vaş zîl beno, mêşnayî zî ê vaşî wenê, goştê mêşnayan zî merdimî wenî. Bi nê hewayî şakîtîya ey reyna agêreno merdiman ser...' ''
Aslanî da vist vîrî ke Seyîd Rizayî embazê ci naye ra ameyî dardekerdene û vat: "Qîm nêkerd meyîtê ci vêşna, welê ci vila kerdî. La hêrsê înan nêqedîyayî. Ewro zî Partîya Vatanî û Perînçek ser o wazenê ke heykelê ci wedarê û nameyê ci kuçeyan ra pak bikê. Wexto ke nînan bikê hêrsê înan do safî bibê? Ney. Seba tay kesî Seyîd Riza sey rayber sey çêrêk dî zorê înan şîyo. Coka nuşt ke Seyîd Riza seyîd nêbi sêwir bi û hema nêeşkayêne êşîra xo îdame biko. Ne Perînçek ne zî rîyakerê ke mîyanê ma de yê nêeşkenê roşnîya beriqîyaye ya Seyîd Rizayî hewna bikê. Seyîd Riza roşnîya seserre ya beriqîyaye yo. Her ke tarîye xo bimojna o do hîna zêde biberiqîyo. Seyîd Riza rûmetê ma yo."
