Zîndananê Tirkîya de ke vera gefê janê vîrusê Korona tedbîrêk nêame girewtene, tepişteyê sîyasîyî mîyanê lapanê mergî de vera dîyenê. Eşkera bi ke Zîndanê Sîlîvrî de tecrîdî ra ber tedbîrêk nêame girewtene. Tepişte Zafer Saglamî rê zî pê şikî testê vîrusê Korona ame kerdene. Babîyê Saglamî Emîrhan Saglamî da zanayene ke netîceya testê lajê ey negatîf a la 11 rojî yo ke lajê ey hucreyê yewkesî de yeno tepiştene.

Saglamî roja 13ê nîsane de pê rayîrê telefonî lajê xo reyde qisey kerd û derheqê babete ANFyî reyde qisey ked. Saglamî ard ziwan ke destpêkê janî ra heta nika zîndan de tedbîrêk nêame girewtene û vat: ''Verî ke lajê mi nêgêrîya hucreyê yewkesî mi ey redye qisey kerdbi. Vatbi zîndan de pakî û awe çin a. Malzemeyê pakîye nêdîyenê înan. Lajê mi nika tecrîdkerde yo. Testê embazê ci yê koxuşî pozîtîf vejîya û înan  lajê mi berd hucreyê yew kesî. Ma pebeyê ci bîyî ke qanûnê înfazî têdûşt bibo la wina nêbi. Vîrusê Korona goş nêkeweno kesî ha xizan ha dewlemen kam bivejîyo verê ci xo reyde beno. Domanê ma mîyanê janî de vera dîyenê. Têna lajê mi nê, rewşa pêro tepişteyan qerqilnena. Hînî vatiş qedîya.''

Waya Zafer Saglamî Bîlge Saglam zî îfade kerd ke kekê aye hewteyê vîyarteyî de înan reyde qisey kerd û vat ke zîndan de pakîye çin a. Bîlge Saglam vat: ''Kekê mi nika hucreyê yewkesî de yo, ma nêzanenê rewşa ey senîn a. Ma zaf qerqilîyenê.''