Çarçewa projeyê 'Haberin Bedeli-Bedelê Xebere' yê Cemîyetê Rojnamegeran de raporê menga teşrîna peyêne ame eşkerakerdene.

Rapor de dîya zanayene ke teşrîna peyêne de 10 şaristanan de 111 rojnamegerî û xebarkarê medya vejîyayî verê mehkeme. Rapor de ame vatene ke 5 rojnamegeran rê bi temamî cezaya zîndanî ya 6 serran û 4 mengan û 12 rojan û cezaya pereyî ya bi 16 hezar lîra ameye dayene.

Cemîyetî pare kerd ke rojnamegerî zêdêr çarçewa 'qanûnê têkoşînê vera terorî' de ameyî sûcdarkerdene. Goreyê raporî teşrîna peyêne de 4 rojnamegerî ameyî destbendkerdene ke nînan ra 3 tenî wextê teqîbê xeberan de ameyê destbendkerdene.