Hemşaredarê Şaristanê Pîlî yê Amedî yê HDPyî Selçuk Mizrakli yo ke hetê rejîmê AKPyî ra ame tepiştene, rayaumûmîye ra mektubêke erşawite. Mizrakliyî behsê îdîayanê bêbingeyînan ê ke derheqê ey yenê kerdene kerd û vat: “Sîstemê edaletî yê Tirkîya binê xizmêtê partîyêke de yo.”

Mizrakliyî vist vîrî ke o weçînayîşê 31ê adara 2019î de bi nîsbetê rayanê 62.9î bi hemşaredarê şaristanê pilî yê Amedî û 19ê tebaxa 2019î de wezîfeyê xo ra amebi girewtene, herinda ey de qeyûm ame tayînkerdene û 22ê teşrîna verêne de zî ame tepiştene. Mizrakliyî îfade kerd ke Tirkîya huqûq qir kena û vat: "A kesa ke waşt qanûnê poşmenîye ra îstîfade bikera 20ê adara 2019î de derheqê mi de vato ke nêweşxaneyo ke ez tede xebitîyena de nobeta şewe de mi 'endamêkê rêxistine' amelîyat kerdo û serê sibayî zî o kes nêweşxaneyî ra vejîyayo şîyo. H.B.A. îdîa kerd ke ey no serebût embazêkê xo ra eşnawit. Coka ne şahîdêk ne zî serebûtêko winasî esto."

Mizrakliyî vat ke 19ê tebaxa 2019î ra heta nika dest nîya 15 şaredarîyanê HDPyî ser û hetê Wezaretê Karanê Zereyî yê Hukmatê AKPyî ra qeyûmî herinda înan de ameyî tayînkerdene. Mizrakliyî pare kerd ke Tirkîya de edalet têna dêsan ser o nuşte yo, sîstemê edaletî bi temamî kewt destê xizmetê partîyêke. Hemşaredar Mizrakliyî venga rayaumûmîye da ke rêxistinê heqanê merdiman û hêzanê demokrasîyî seba kurdanê Tirkîya gamêke bierzê û seba qedînayîşê tedaya partîyanê sîyasî xîret bikê.