Mehkemeya Qanûnê Bingeyî seba cigêrayîşê îdîanameyê qefilnayîşê HDPyî ewro saete 10.00 de kom bîye. Mehkemeya Qanûnê Bingeyî  serdozgerîya Bekîr Şahînî de lezabez bire daye û îdîaname qebul kerd. Waştişê tedbîrê vera malê partîye zî ame redkerdene.

Îdîanameyo ke hetê Serdozgerîya Komare ya Mehkemeya Berze Bekîr Şahînî ra ame amadekerdene, 7ê hezîrane de Mehkemeya Qanûnê Bingeyî ra erşawîya. Şahînî îdîanameyê bi 843 rîpelî de waşt ke 452 kesan rê sîyasetkerdiş bêro qedexekerdene. Raportorê Mehkemeya Qanûnê Bingeyî zî vatbi 'ganî îdîaname bêro qebulkerdene.' Heyetê Pêroyî yê Mehkemeya Qanûnê Bingeyî zî serê sibayî bira xo ya peyêne daye û îdîaname qebul kerd.

Îdîaname seba pawitişê verênî do HDPyî rê bêro erşawitene. HDP zî ganê wextê dîyarkerî de pawitişê xo Mehkemeya Qanûnê Bingeyî rê bikero.

Pawitişê HDPyî ra dima Serdozgerê Komare ya Mehkemeya Berze Bekîr Şahînî fikrê xo do pêşkêş bikero. Fikr do HDPyî rê bêro erşawitene û dima zî selahîyetdarê HDPyî do pawitişê fekkî bikerê.

Bira dewaya qefilnayîşî hetê 15 endamanê Mehkemeya Qanûnê Bingeyî ra dîyaye. Mehkemeya Qanûnê Bingeyî do dîyarker biba. Selahîyetê Mehkemeya Heqanê Merdiman a Ewropa çin o ke bira Mehkemeya Qanûnê Bingeyî vindarna. La eşkena bira binpaykerdişî bida.