HDPyî waştbi ke dadgerê dewaya qefilnayîşî bêro vurnayene la Mehkemeya Qanûnê Bingeyî (MQB) no waştiş red kerd.

Hetkarê Hemserekanê Pêroyîyan ê HDPyî yê Komîsyonanê Heqanê Merdiman û Huqûqî ra Berpirsîyar Av. Serhat Erenî derheqê babete de ANFyî rê qisey kerd.

Erenî vist vîrî ke dima ke înan pawitişê xo kerd serdozgerîyanê Semsûr û Anqara binê nameyê 'delîlanê neweyan' de dokument û qeydê vengî yê neweyî şawitê. Erenî vat: ''Nê qeydî û belgeyî derheqê Semra Guzel de yê. Ma ney rê îtîraz kerd çunke nê çîyî aîdê ê çaxî yê ke Guzele hema wekîla ma nêbîye û qeydê vengî zî aîdê serranê 90an ê. Xora dewa de wextê pêşkêşkerdişê 'delîlan' qedîyabi. Hetê bînî ra MQByî ganî pê yew pênase nê çîyî ma rê bierşawitêne. Yanî MQByî hema nê çîyî sey 'delîlî' qebul nêkerdê la endamê înan seba nînan vato 'sey delîlî yê.' ke wina yew selahîyetê ey çin o. Ma tîya ra fam kenê ke MQB bêteref nîyo. Naye ra ma waşt ke wa dadger erkî ra bigêrîyo la waştişê ma nêame caardene.''