Wan de bi destûrê qeyûmî vaya nanî reyna zêdîyaye û 2.50 lîra ra bîye 2.80.

Wekîla HDPyî ya Wanî Muazzeze Orhan derheqê babete de ANFyî rê qisey kerd. Orhane îfade kerd ke polîtîkayanê şerî yê îqtîdarî ra welat kewto mîyanê krîzêkê giranî yê ekonomî. Orhane da zanayene ke no krîz Wan de zaf yeno hîskerdene û polîtîkaya şerî ya îqtîdarê AKP-MHPyî, rant û bêusulîye şar kerdo muhtacê nanêkî.

Orhane ard ziwan ke xeylêk şaredaranê Tirkîya de nan bi erjanî roşîyeno la qeyûmê Wanî cayê Nanê Şarî qefilnayê. Orhane vat: ''Qezayanê Tûşba, Rêya Armûşê, Artêmêtanî de Nanê Şarî de nan bi erzanî ameyêne rotene. Taxanê nê qezayan de qeyûmî caardişê Nanê Şarî vindarna yan zî firinê ke nêzdîyê nê cayan bîyê qefilnayî. Coka şar zaf mexdûr bi.''