Roniştişê bire yê dewaya vera Mustafa T.yo ke madeya 129. ya Qanûnê Ceza ya Almanya ra ameyêne muhakemekerdene şaristanê Munchenî de ame kerdene.

Bi îdîaya 'endamîya rêxistine' cezaya zîndanî ya serrêke û 4 mengî dîyaye Mustafa T. û bi şertê kontrolî vera dîya.

Dewa da Mustafa T. kampanyaya hetkarîye, amadekerdişê otobusanê çalakîyanê kurdan û serweşîye waştişî ra ameyêne sûcdarkerdeneç

Avûkatê Mustafa T. Rene Bahnsî îfade kerd ke rewşa weşîya muwekîkê ci hol nîya coka bire lez ameye dayene. Bahnsî ard ziwan ke mehkeme qedexeyê vera PKKyî ra waşt ke cezaya di serran bida Mustafa T. Bahnsî da zanayene ke no qedexe pêro Ewropa de skandalêka sîyasî ya.

Bahnsî vat: ''Mehkeme bi xo vat ke Tirkîya de teda û binpaykerdişê heqan estê. Tukrologêk zî tewrê mehkeme bi û îfadeyê muwekîlê mi tesdîq kerd.''

Munchen de bi bahaneya ke alayê YPG, YPJ û PYDyî medyaya dîjîtale de vila kerdî dewaya Kerem Schambergerî cezaya pereyî ya 4 hezar dîyaye ci. Kerem Schambergerî vat: ''Hetê sîyasî ra ma ser kewtî. Mîyanê 24 saetan de bi rayîrê Paypalî no pere arê dîya.''

Almanya de 9 aktîvîstê kurdî sebebanê sîyasîyan ra hem zî tepişte yan zî hukmwerde yê. Goreyê doneyanê Buroyê Huqûqî yê Azadîye Almanya de kurdîstanijê ke goreyê madeya 129. tepişîyayî wina yê:

* Merdan K. 20ê êlule de tepişîya û Zîndanê Stammheimî de yo.

* Zîyaretê Wezîrê Karanê Teberî yê Tirkîya Mevlut Çavuşogluyî ra dima Berlin de 7ê gulana 2021î de sîyasetmedaro kurd Abdullah O. û hunermend Mazlum D. tepişîyayî. Abdullah Frankfurt de, Mazlum D. Stammheim de zîndan de yo.

* Mîrza B. 30ê nîsane de Nurnberg de tepişîya.

Wextê roniştişî yê çar kesan hema eşkera nêbi.

* Kamuran Y. V.o ke 1ê teşrîna peyêne ya 2019î de Meydanê Teyarayan ê Zurichî de tepişîyabi, 22ê hezîrana 2020î de ame berdene bi Almanya û Zîndanê Stammheime de tepişte yo.

* Dewaya vera 5 kurdîstanihanê ke 19ê nîsana 2019î de şaristanê Stuttgartî yê Almanya de dest pêkerde 30ê nîsane de qedîyaye. Veysel S. rê cezaya 4 serran û 3 mengan û Agît K. rê cezaya 4 serran dîyaye. Ozkan T. vera dîya, Evrîm A. û Cîhan A. zî bi şertê kontrolî vera dîyayî.

* Sîyasetmedaro kurd Gokmeno ke zîyaretê Tirkîya yê Merkele de tepişîya, 2ê çeleyê 2020î ra nata tepişte yo. Gokmen rê cezaya 3 serran û 5 mengan dîyaye.

* Mûstafa Ç. çeleyê 2020î de tepişîya. Cezaya zîndanî ya 2 serran û 7 mengan dîyaye ci.