Sekreterê Pêroyî yê Organîzasyonê Efî yê Mîyanneteweyî Kumi Naidoo yo ke Afrîkaya Başûre de serranê 1870-1980î de vera Rejîme Apartheidî şer kerd û dima zî vera feqirîye têkoşîya û seba pawitişê heqanê merdiman sewîya mîyanneteweyî de têkoşînê xo dewam kerd  ANFyî rê qisey kerd.

'Kiryarê Tirkîya manenê yê Dewrê Apartheidî

Naidooyî ard ziwan ke şeklê rayberîya Tirkîya yê halê hazirî maneno kiryaranê Demê Aparthidî yê Afrîkaya Başûre û nîşan kerd ke astengkerdişê azadîya kombîyayîşî, îfadeyî, şermezarkerdişî û organzebîyayîşî û tedayî yê ke  çapamenî ser o yenê kerdene manenê Demê Apartheidî.

'Tewr zêde çêrîya mayanê şemeyî mi ser o tesîr kerd’

Kumî Naidooyî dîyar kerd ke demo ke Îstanbul de bîyo bi giranî tewrê têkoşîna mayanê şemeyî yê kombîyayîşê 762.an bîyo û tewr zêde têkoşînê înan ey ser o tesîr kerdo û vat: “Têkoşînê înan ê bi serran û birredarî gelek mi ser o tesîr kerd. Binê nezaretî de vîndîkerdişê merdiman welatê ma de zî ameyêne kerdene. Embaza min a tewr başe Zandî û eynî demî de hemrayê mi hetê polîsan ra ameyî kîştene. Ez zana ke na yewe çiqas merdimî dejnena.”

‘Problem tena ê kurdan nîyo ê her kesî yo’

Naidooyî ard vîrî ke seba ke bi serran o estbîyayîşê xo wazenê kurdî Tirkîya û teberê Tirkîya de benê hedefê galan û nîşan kerd  ke teşrîna verêne de o şîyo Sûrîye, a herême de Kobane, Reqa û Qamişlo zîyaret kerdê, Kurdê Sûrîye bi serran seba estbîyayîşê xo vera Rejîmê Esadî têkoşîyayî. 

Naidooyî nîşan kerd ke bi nameyê Organîzasyonê Efî yê Mîyanneteweyî o vera her şeklê nîjadperestî yo û vat: “Demo ke Afrîkaya Başûre de peynîya Rejîmê Apartheidî ame, tayênan vat ke dinya de peynîya nîjadperestîye ameye. Labelê rastîye wina nîya. Têkoşînê seba estbîyayîşî hîna zî dewam kenê û kurdî zî seba na yewe têkoşîyenê. Çimê mi de mesela kurdan tena mesela kurdan nîya, mesela her kesî ya.”

Naîdooyî diyar kerd ke eke yeno waştene ke komel bêro başkerdene û fehmkerdene ke çi ameyo kamî sereyî ser ganî Komîsyonê Rastîyan ê Wereameyîşî bêro ronayene û vat: “Seba ke hukumet birînan bipêşo  ganî destpêkê mesela bivîno û munaqeşe bikero. Seba na yewe Komîsyonê Rastîyan ê Wereameyîşî girîng o.

'Ganî merdimî hêvîye tim bipawerê’

Kumi Naidooyî nîşan kerd ke gore tecrubeyê xo ganî merdim çirey bêhêvî mebo û dîyar kerd ke rêşvînîya seba seypênêbîyayîşî tena bi weşvînîya têkoşînî û vera nêheqîyan kombîyayîşî eşkena bêra binfînayene. Naidooyî ard vîrî ke vera rejîmanê nîjadperestan û kolonyalîzmî zaf cayanê dinya de têkoşînî estê û nîşan kerd ke çi yo girîng kombîyayîşê nê têkoşînan o.