Merkezê Yewîya Komeleyanê Êzidîyan (NAV-YÊK) kongreya xo ya 3. viraşte. Bi desan endamê NAV-YÊKî tewrê kongre bîyî. Kongre bi şîarê 'Wext Wextê Agêrayîş, Awankerdiş û Xoserîya Şingalî yo.'' ameye serûberkerdene.

Destpêkê kongre de hemserekanê verênan Çîçeke Yildiz û Yilmaz Gunayî xemgînîya xo ya seba wefatê Bavê Şêxî arde ziwan.

Endama Konseya Serekîya Pêroyî ya KCKyî Sozdar Avesta zî kongre rê mesajêk erşawit. Avesta mesajê xo de îfade kerd ke bi na kongre seba azadî û statuyê Êzidxan û Kurdîstanî xoverdayîş û têkoşînêko tarîxî yeno kerdene. Avesta pêro êzidîyan ra waşt ke seba pawitiş, awankerdiş û statuyê Şingalî bixebitê û ba çarçewe de wayîrê kampanyaya Meclîsê Şingalî vejîyê.

Kongre dima raporê xo eşkera kerd. Rapor de ame parekerdene ke ganî êzidîyî her wextî ra zêdêr giranîye bidê îtîfaq û rêxistinbîyayîşê xo ser.

Kongre de endaman pêşnîyaz û rexneyê xo ardî ziwan.

Netîceya kongre de Çîçeke Yildiz û Hecî Çelîk sey Hemserekanê NAV-YÊKî ameyî weçînayene.