Kongreya Demokratîke ya Şaran (HDK) netîcenameyê kombîyayîşê 2. yê Meclîsê Pêroyî yê Dewrê 11. eşkera kerd.

Netîcename de verî Abimael Guzman ame yadkerdene, grevê vêşanîye yo ke roja 290. de amebi qedînayene ame selamkerdene.

Netîcename bi kilmî wina yo:
''-Hukmatê Tirkîya hewcedarîyanê esasan ê multecîyanê afganan nêano ca û ziwanê nefretî yê vera multecîyan geş keno. HDK bi taybetî Meclîsê Cinîyan ê HDKyî vera Talîbanî hetê cinîyan ê afganan de ca gênê.

-Amerîka verê hêrişanê Tirkîya yê serê Rojawanî akena. Hukmatê Tirkîya têkilîyanê xo yê xiraban ê bi Amerîka û Yewîya Ewropa keno raşt la hêrişanê xo yê vera Rojawan û Başûrê Kurdîstanî dewam keno.

-Îqtîdarê AKP-MHPyî bingeyê Darbeya 12ê Êlule ser o ronişeno. AKP-MHP dişmenê cinîyan, kurdan, multecîyan, demokrasî û haştîye yo. Bi taybetî dewrê nê îqtîdarî de hêriş û qirkerdişê vera cinîyan zêdîyayî. Vera ney ma do dezgehanê cinîyan reyde têkoşînê hemparî bîyarê ca. Eşkera yo ke îqtîdar semedê estbîyayîşê xo nê polîtîkayanê teda û şîdetî ano ca. Coka wezîfeyê HDKyî yo ke vera ney bi rêxistinîye têkoşîn bikero. HDK do bername û stratejîya xo cuya rojane de bîyaro ca, meclîsanê xo abikero. Ablûqaya îdeolojîke ya rejîmî wina eşkeno bişikîya.''