Emser şayîyê Newroze bi vengdayîşê ‘Haştîye û Komelê Demokratîkî’ yê Rayber Apoyî hîna manadar derba bîyî. Îstanbul de kurdan Newroze de mojna ke ê Rayber Apoyî reyde yê.

Komîteya Amadekarîye ya Newroze seba kombîyayîşî saeta 10î dîyar kerdibi la kurdî di saetî verî herikîyayî warê Newroze. Girseyî bi sloganê ‘Bijî Serok Apo’ dekewtî meydanî. Wextê qiseykerdişan de zî no slogan nêvindert.

Ciwanan posterê qij û pîlî yê Rayber Apoyî akerdî û meydan de çarnayî. Wexto ke vengê Rayber Apoyî ra mesajê ci yê Newroze ame wendene tayê kesî bermayî.  Dima girseyan pîya ancî vat; ‘’Bijî Serok Apo.’’

Kurdan Îstanbul de cewabê hewceyî dayî her kesî. Îqtîdarî rê vat: ‘’Perwerîya ma ya bi Rayber Apoyî nêvurîyaye.’’ Kurdan CHPyî rê zî cewabo hewce da.

Bi taybetî kurdan vera qiseyanê nîjadperestan ê Mansur Yavaşî nêrazîbîyayîşê xo mojna. Naye ser o Serekê CHPyî Ozgur Ozelî şan kurdan ra uzrê xo waşt.

Kurdan Newroza Îstanbulî de ancî perwerîya xo ya bi Rayber Apoyî û Têgêrayîşê Azadîye yê Kurdan mojnaye. Îradeyê xo bi xurtî mojna û beyan kerd ke ê heta peynî Rayberê xo reyde yê.