Vervatoxa Karanê Teberî û  Endama Konseya Rayberdişî ya KNKyî Nilufere Koç derheqê vengdayîşê tarîxîyî yê Rayber Apoyî de cewab da persanê ANFyî.

Qiseykerdişê Nilufere Koç ra qismêk wina yo:

''Belge de ca nêdîyo ci zî paragrafo ke Sirri Sureyyayî vat zaf muhîm o. Metnê tirkî de çînêbo zî açarnayîşanê ziwananê xerîban de  ca girewt. Xora Rayber Apo no paragraf verê heyetî de vato û antişê kamera de ameyo vatene. Nika persê ke zaf yenê persayene ra yew zî vera gamanê girdan de çi ame waştene? Cewabê nê zî paragrafê peyênî yê Rayber Apoyî de yo, serûberkerdişo huqûqî û sîyasî. Vengdayîşê bedilnayîşê demokratîkî est o ke kurdî û şarê bînî bi nasname, ziwan û kulturê xo azad bieşkê biciwîyê.

Hetê bînî ra xora feskerdişê PKKyî û çeke ronayîş wina lezabez nêbeno. Gerek verî temînatê nê bêro dayene. PKK têgêrayîşê 50 serran o ke morê xo dayo tarîxê Kurdîstanî ro û hêzê ci ey ra wet o. Rayber Apoyî veng da PKKyî ke wa kongreya xo bikero. PKK û hêzê pabesteyê ci do nê prosesî çarçewaya proseduranê mîyanê xo de bierjnê. Murat Karayilanî verî vatbi vengdayîşo bi vîdeo qîm nêkeno.  Nika seba ke proses lez bêro rayraberdene gerek Rayber Apo şertanê azadan de vengdayîşî bi xo bikero.

Semedê kurdan ê Ewropa zî nê proses zaf muhîm o. Hemleya Azadîye ya ke 10ê teşrîna verêne ya 2023yî de dîyaye destpêkerden dewam kena. Semedê paştdayîşê mesajê Rayber Apoyî warê mîyanneteweyîyî ra zaf mesajî ameyî. Xora ma tim vatêne rayîrê haştîye azadîya Rayber Apoyî ra ravêreno. Ma semedê nê waştişê xo biisrar ê. PKK çi wazeno nêzana  la semedê ma yê ke teberê welatî de yê azadîya Rayber Apoyî esas a. Rayber Apo, hetê kurdan çîyo ke gerek bikerî kerd, naye ra wet tiway çîn. Almanya ke 30-40 serrî yo vera PKKyî têkoşîn kena a zî semedê bedilnayîşî veng da. Kurdan, Ocalanî gama xo eşte û nika dora hetê bînî ya.

Ma tim vat qedexeyê vera PKKyî huqûqî nîyo qerarêko sîyasî yo. La hinî maskeya nê polîtîkayanê qedexeyî ginena war. Çunke tîya meseleya esasî PKK nîyo, ameyoxê şarêkî yo. Seba ke şarêkê pancas mîlyonan sey netewe qebul mekerê PKK kerd bahane. Eynî wextî de waşt PKKyî ra qesas bigîrê. Çunke xeyrê PKKyî netewêka pancas mîlyonan xo îfade kerd, probelemê xo ardî ziwan.  Berlin de, London û Paris de kurdan bi vatişê 'Şima ma kerdî problem' hesab persayî. Têkoşînê Rayber Apoyî şarê kurdî ard yew nûqta ke nê persî persa. Nê semedî ra vera kurdan şerêko sîyasî dîya destpêkerdene. Bi hezaran kesî ameyî hepskerdene. Xeylê kurdê ke Ewropa de ciwîyenê pasaport, nasname û heqê hemweletîye destê înan ra ame girewtene.  

Yewîya Ewropa 2002 de PKK girewt lîsteya rêxistinanê terorî. O wext prosesê adirbirnayîşî bi, bedilyayîş û haştîye ameyêne qiseykerdene. Demo ke têkoşîno sîyasî ameyêne qiseykerdene wina yew hêriş ame kerdene. Nika proseso newe est o. Eşkerayîyanê çapemenîye û dormeyanê nizdîyê dewletan ra yeno famkerdene ke nika rewşe bedilîyaye. Înanê ke verî cedhkerdişê haştîye yê kurdan kriminalize kerdêne ewro rîyê zextê îqtîdarê AKPyî ra zor de mendî. Nika Ewropa Tirkîya ra vana 'gerek ti bibedilîye.' No averşîyayîşo zaf muhîm o û semedê dîplomasîya kurdan firsetêko gird o. Ewropa sey verî paştî nêdana Tirkîya.  Eke no firset hol bêro erjnayene vengkerdişê hetê hîrêyînî eşkeno bêro dekerdene. Tay hetan hêvîya xo pabesta têgêrayîşê kurdan.''