Nobeta Azadîye endamanê Kongreya Starî de ya

Nobeta Azadîye ya ka 10 serrî yo semedê azadîya fîzîkîye ya Raybarê Şarê Kurdî Abdullah Ocalanî yena rayraberdene hetê endamanê Kongreya Starî ra ameye dewrgirewtene.

Nobeta Azadîye ya ka semedê azadîya fîzîkîye ya Raybarê Şarê Kurdî Abdullah Ocalanî 25ê hezîran a 2012yî de bajarê Strasbourgî yê Fransa de ameye destpêkerdene serra 10. de dewam kena.

Çalakîya ke verê dezgehanê Ewropa de yena kerdene û her hewte hetê grûbêke ra yena raraberdene  hewteyê 488. de hetê endamanê Kongreya Starî yê ke Almanya ra ameyî ra ameye dewrgirewtene. Grûbe de Nayîme Hessen, Asîye Reşît û Zarîfe Misto ca genê.

Nayîme Hessena ke bi nameyê grûbe qisey kerd ard ziwan ke azadîya Abdullah Ocalanî deynê milê heme kurdan o û vat: ''Pê paradîgmaya Ocalanî ke azadîya cinîyan esas gena cinîyê kurdî têkoşînê tarîxîyî danê. Bi rehîngirwtişê Rayber Apoyî qirkerdişê şarê kurdî yeno waştene. Têna Rayber Apo eşkeno verê qirkerdişan bigîro û meselaya kurdan bi rayîranê demokratîkan çareser bikero. Ewropa senî ke paştî daye komployê mîyanneteweyî ewro zî vera şuxulnayîşê çekanê kîmîyewîyan bêveng a. Dezgehê eleqedarî yê Ewropa ganî berpirsîyarîya xo bîyarî ca û şirê Tirkîya ser.''