Nobeta Azadîye hewteyê 463. de ya

Nobeta Azadîye ya ke seba azadîya Rayberê Şarê Kurdî Abdullah Ocalanî şaristanê Strasbourgî yê Fransa de yena kerdene, hewteyê 463. de dewam kena. No hewte Duisburgî ra komêke nobete dewr girewte.

Nobeta Azadîye her hewte şaristanê Strasbourgî yê Fransa de pê komêka cîya yena kerdene û emser serra 9. ya çalakîya nobete ya. Nobeta Azadîye 25ê hezîrana 2012î ra nata seba azadîya Rayberê Şarê Kurdî Abdullah Ocalanî yena kerdene.

Çalakîye verê Mehkemeya Heqanê Merdiman a Ewropa, Konseya Ewropa, Parlamentoya Ewropa û Komîteya Vergirewtişê Îşkenceyî ya Konseya Ewropa (CPT) de yena kerdene.

Nobete hewteyê 463. de dewam kena. No hewte Duisburgî ra komêke nobete dewr girewte. Komêke de kurdîstanijî Xebat Taş, Îsmaîl Mînkara û Cemîl Tok ca gênê.

Xebat Taşî nameyê kome ser o qisey kerd û xoverdayîşê gerîlayan ê vera hêrişanê îşxalî selam kerd. Xebat Taşî îfade kerd ke pê na çalakîya 9 serre kurdî eşkera kenê ke ê bê Rayberîye cuye qebul nêkenê. Taşî vat: ''Rayber Apoyî şaro ke amebi kerdene binê erdî, newe ra gandar kerd.''

Taşî vist vîrî de gulana 1982î de Mehmet Karasungur û Îbrahîm Bîlgîn şehîd bîyî û şehîdê menga gulane yad kerdî. Taşî da zanayene ke hedefê Karasungurî caardişê yewîya neteweyîye bi û canêardişê na yewîye kêmasîyêka pîl a. Taşî pare kerd ke PDK verê yewîya neteweyîye de astengêk o û ganî hesab bido kurdan.

Taşî xoverdayîşê zîndanan û gerîlayan selam kerd û venga kurdan da ke wa wurzê payan ser.