Merdimanê tepişteyan seba ke bale binancê rewşa tepişteyanê nêweşan û zextê zîndanî ser xeylêk bajaran de Nobata Edaletî tepişenî. Amed, Wan û Îstanbul de nobete dewam kerde. Çalakîyan de reyna edalet ame waştene.

Îstanbul de dayîkan çalakîya xo verê Edlîyeya Îstanbulî de kerde. Wekîlê HDPyî yê Îstanbulî Alî Kenanoglu, Mayê Haştîye û merdimê tepişteyan tewrê çalakîye bîyî. Polîsan destûr nêda eşkerayîye bêro dayene. Keyeyan tewirê polîsan bi çalakîya bêvenge şermezar kerd. Wekîl Alî Kenanogluyî seba ke polîsan dayîkî bi destbendkerdişî tehdît kerdî nêrazîbîyayîş mojna û vat dayîkî wayîrê qicanê xo vejîyenê û muhakemekerdişê edîlî wazenê. Dima ra merdimê tepiteyan pê tîlîlîyan kewtî têerme  û bi slogana ''Biciwîyo Xoverdayîşê Zîndanan'' ver bi verê edlîye rayraşîyayîş kerd.

Amed de zî merdimê tepişteyan verê edlîye de ameyî têhet. Xeylêk partîyanê sîyasîyan û dezgehê komelê sîvîlî paştî da çalakîye. Çalakwanan ra Herdem Merwanî veng da ke wa partîye sîyasîyî semedê çareserî game bierzê. Reşahate Ada zî vat ê do Roşanê Remezanî de zî semedê cigêrayîşê heqî meydanan de bê û roşanî verê zîndanî de bimbarek bikerê. Nuraye Abay zî vat heta caardişê edaletî ê do tim bi vengê pêtî biqîrê. Çalakîye bi slogana ''Biciwîyo Xoverdayîşê Zîndanan'' qedîyaye.

Wan de zî bi eynî waştişî çalakîye verê edlîye de dewam kerde. Wekîlê HDPyî yê Wanî Muazzeze Orhan û Murat Sarisaç û xeylêk dezgehan zî paştî daye çalakîye. Polîsan destûr nêda eşkerayîye bêro dayene.  Dayîka Botan Timurî Aslihan Timur vera polîsan hêrsê xo ard ziwan û vat: ''Ma têna edalet wazenê. Eke şima nêwazenê ma nobete  tepişê, qicanê ma veradê ma zî şirê keye.''