Endamê Grûba Xebate ya Vateyî, nuştox û roşnvîr Mehmûd Nêşiteyî 8ê teşrîna peyêne de saete 23.56 de nêweşxaneyêkê Amedî de dinyaya xo bedilnaye.

Cenazaya ey ewro saete 10.30 de Goristanê Yenikoyî yê Amedî de do bêra definkerdene. Tazîya zî do Camîya Bedîuzzemanî ya Kayapinarî de do bêra ronayene.

Mehmud Nêşite 1945 de Dik de ameyo dinya. 1963 de dest bi malimîye kerde. 1994 de malimîye ra teqawit bi. 1968 de dekewto mîyanê îdareyê şubeyê TOSî (Senadîkaya Malimanê Tirkîya) yê Silîvan. A game Rojen Barnas serekê şubeyê sendiqa yê Silîvan bîyo. 1974 de Silîvan de şubeyê TOB-DERî (Komeleya Yewîya Malimanê Tirkîya) awan kerd. Çar-panc serrî serekîya TOB-DERî kerde. 1980 de surgunê Çorumî bi. Uca wazifeyê malimîya ra ame eştiş la dima reyna agêra gureyê xo ser û dest bi wazîfe kerd. Çorum ra şi Dortyolê Hatay. Ey û çend emabazanê xo uca şubeyê EGİT-SENî (Sendîkaya Kedkaranê Perwerdeyî) rona. Çar-panc serrî Dortyol de serekîya şubeyê na sendiqa kerde. 1994 de malimîye ra teqawut bi. Teqawutbîyayîşî ra pey Dortyol de têpîzede new serrî serekîya şubeyê HADEP (Partîya Demokrasîya Şarî) û DEHAP (Partîya Demokratîke yê Şarî) kerde.

Eserê ey ê ke weşanîyayê nê yê:

1) Mehmûd Nêşite, Qehremanîya Vîta Zingure, Weşanên Enstîtuya Kurdî ya Amedê, Dîyarbekir 2010, 16 rîpelî

2) Mehmûd Nêşite, Biza Kole Asnawî Kena, Weşanên Enstîtuya Kurdî ya Amedê, Dîyarbekir 2010, 12 rîpelî

3) Mehmûd Nêşite, Luya Rîsîyaye Û Ap Elî, Weşanên Enstîtuya Kurdî ya Amedê, Dîyarbekir 2010, 12 rîpelî

4) Mehmûd Nêşite, Çakêto Sipî, Weşanxaneyê Vateyî, Îstanbul, 2012, 120 rîpelî