Wekîlê HDPyî yê Riha Omer Ocalanî bi wesîleya Komployê Mîyanneteweyî yê 9ê Teşrîna Verêne ya 1998î ANFyî rê qisey kerd.

Omer Ocalanî da zanayene ke Komployê Mîyanneteweyî hedefê xo nêvistî destî.  Omer Ocalanî vat: ''Abdullah Ocalanî xoverdayîşêko pîl ê rûmetî kerd, o motîvasyonê şarê kurdî yo. Dewlete çîyo ke 24 serran de nêeşkaya bikera, 2015 ra nata wazena bi metodanê cîyayan bikera. Seba şiknayîşê tecrîdî hetê sîyasî, huqûqî û komelkî ra têkoşînêko pîl yeno kerdene. Wezîrîya Edaletî mesuldara nê kerdişan a. Xora tecrîd bi destê AKP-MHPyî ameyo dîzaynkerdene. Eke Îmrali de rewşêka negatîfe biqewimîya mesuldarê ci nê yê.''

Omer Ocalanî bale ante ser ke zîyaretê Îmraliyî yê CPTyî girîng o la ganî CPTyî raporê xo serrêke pey ney nika eşkera bikerdêne. Omer Ocalanî vat: ''Şarê kurdî ney qebul nêkeno. Ganî CPT eşkera bikero ke Îmrali de çi qewimîyeno, Tirkîya ha uca de se kena. Eke eşkerayîya CPTyî yena astengkerdene o çax aseno ke uca de çîyê xirabî qewimîyenê. Ocalan hetê pozîsyonê xo ra, temsîlîya xo ra wayîrê cayêkê girîngî yo. Vera Ocalanî polîtîkaya dişmenîye yena kerdene û ganî CPT ney bivîno. Ganî CPT cade çimdarîyanê xo rayaumûmîye de vila bikero. Ganî CPT bêcidîyetê Tirkîya raporî bikero.''

Omer Ocalanî vist vîrî ke 19 mengî yo Îmraliyî ra yew xebera înan çin a û vat: ''Nika prosesêko winasên est o ke bê Ocalanî qala Ocalanî yena kerdene. Heqê vatişî yê Abdullah Ocalanî yeno xespkerdene. Ma venga dewlete danê ke wa cidî têbigêra. Huqûqê dişmenîye zî wayîrê yew nîsbetî yo. Vera Abdullah Ocalanî huqûqê dişmenîye zî nêno caardene. Ganî Îmrali de zîyaretî bibê rûtîn. Abdullah Ocalan muxatabê çareserîya demokratîke ya meseleya kurdan o. Ma seba ney têkoşîn kenê û do bikerê. Serra 24. ya Komployê Mîyanneteweyî de ma do 9ê teşrîna verêne de Îstanbul de bibê. Ma do nê komployî lanet bikerê.''