Serekkomarê Tirkîya Erdoganî îlan kerd ke ê do binê serbanê Wezîrîya Kultur û Turîzmî de Serekîya Cemxaneyan û Kulturê Elewî-Bektaşîyan awan bikerê. Sereko ronayox ê Konfederasyonê Yewîyanê Elewîyan ê Ewropa (AABK) Turgut Okerî babete ANFyî rê ercna.

Okerî vat: ''Wazanê ke elewîyan ercanê ci ra raqilnê û sey hemkarê sûcanê xo bişxulnê. Bingeyê nê paketî komxebata elewîyan ê 2009 de ameye eştene.  Ma xora na game pawitene. Na game yena manaya heme xirabîyanê ke dewlete elewîyan rê kena. Dewlete seserrî yo elewîyan têna sey problemê asayîşî vînena. Seserrî yo semedê elewîyan qet yew warî de yew gama hole nêameye eştene. Inkey Suleyman Soylu pîya bi sêwîrmendê xo Ali Arif Ozzeybekî yo ke CHPyî ra transfer kerdo no proje kerd. No tesaduf nîyo. Kiliçdaroglu û wekîlê bînî yê CHPyî zî vera nê projeyî nêvejîyayî. No yeno no mana ke îtîfaqê mîletî nê projeyî tesdîq keno.

Gama ke qala elewîyan bena heme partîyê sîstemî benê yew, eynî polîtîka rayra benê. Pê nê projeyî yeno waştene ke dezgehanê elewîyan bigêrê binê kontrolê xo. Senî ke camî girewtî binê kontrolê xo wazenê cemxanayan zî wina bigêrê binê kontrolê xo. Kontrolî ra wêter no operasyonê çînkerdişê elewîtîye yo. Kenê ke elewîyan asîmîle bikerê, bawerî û ercanê ci ra raqilnê tênê nameyê ci biverdê. Wazenê elewîyan biverdê yewbînan. Elewîyan badê Qirkerdişê Madimakî xo rêxistin kerd û ewro Tirkîya û Ewropa de bi dezgehanê xo wayîrê ercanê xo vejîyenê û xo pawenê. Dewleta ke nêeşkena elewîyan bigêro binê kontrolê xo bi sîyasetê sadaka kena ke elewîyan cêserbifîno.

Mîsyonê qoricîyan mîyanê komelê kurdan de senîn o,  do yê dedeyanê ke do meaş bîgêrê zî wina bo. Dewlete elewîtîye sey bawerî nêvînena. Ê cemxaneyan sey keyeyê kayî vînenî. No operasyonê destfînayîşê elewîyan o. Ganî elewîyî nê kayan a mexapîyê, vera nê projeyî bivejîyê. Ganî şarê ma tewir ramojno. Cemxaneyê ke dedeyê ci meaş genê nêşiro nê cemxayene. Ganî kurd, sosyalîst, kedkar û cinîyî ma pêro bibê yew û vera nê têkoşîn bikerê. Elewîyî heqanê xo wazenê. Elewîyî sere de heqê hemwelatîya secîye wazenê. Wazenê her warê cuye de bi nasnameyê xo bêrê şinasnayene û bawerîya xo azad biciwîyê.''