Serekwekîlê Koma HDPyî Saruhan Oluçî derheqê felaketê vewrêsî yê Miksê Wanî de Meclîs de kombîyayîşêkê çapemenîye kerd. Oluçî bale ante erlerzê Xarpêtî, felaketê vewrêsî û qezayê teyara yê Sabîha Gokçen ê Îstanbulî ser. Oulçî eşkera kerd ke felaketê vewrêsî de 38 kesî merdî û hema zî zaf kesî binê vewre de yê.

Oluçî ard ziwan ke seba felaketan amadekarîyêke çin a û vat: ''Erdlerzê Xarpêtî de bi rojan hetkarîye nêrsaye dewan. Ma zî persa va ke bacê erdlerzî şîyî kamca la îqtîdarî persê ma peygoş kerd. Xarpêt de hema zî erdlerzî benê û şar serd û sipûr de xeyman de ciwîyeno.''

Oluçî da zanayene ke felaketê vewrêsî yo diyîn felaketêko pîl o û vat: ''Mîyanê şertanê normalan de zî raywanîya ver bi Miksî zor a. Nê şertan de vewrês ame. Netîceyê ci verê çiman de yê. Zaf îdîayî estê ke vanê bêtebdîrîyêka pîle esta. Wexto ke nê felaketî qewimîyayî weşanayê Miksî ameyî astengkerdene û qiseykerdişê Serekê Pêroyî yê AKPyî ame mojnayene.

Bêrê ma Meclîs de qala bêtebdîrîyan a vera felaketan bikerê, ma pêşnîyazê xo bikerê û muneqeşa bikerê. Eke no vengdayîşê ma nêro qebulkerdene ma do tewrê muneqeşayê qanûnî nêbê. Heyetê partîya ma vizêr zî û ewro zî Miks de bîyî. Ewro wekîlanê ma ra komêke do şora Miks. No paştdayîş seba ma pêroyînan zaf girîng o. Ma do xebatanê xo dewam bikerê.''