Olûç: Operasyonê qesasgirewtişî yê vera Kurdan yeno domnayene

Serekwekîlê Grûba HDP'yî Sarûhan Olûçî vat, "Bi îstîqrar qeyûmtayînkerdişê na dewlete dewam kenê. Dewam kenê ke îradeyê şarî xesp bikê. Îqtîdar bi nê operasyonî wazeno ke Kurdan û HDP'yijan ra qesas bigero.

Wekîlserekê Grûba Partîya Şaran a Demokratîke (HDP)  Sarûhan Olûçî kombîyayîşê çapemenîye yê meclîsî de rojdem ercna.

Olûçî bale ante polîtayanê hêrişkaran ê îqtîdarî ser û va: ‘‘ Îqtîdar bi heayêko nîzamî qeyûman tayîn keno. Dewam keno ke îradeyê şarî xesp biko, têgêrayîşanê bêhuqûqîyan keno. Operasyonê qesasê îqtîdarî yê serê HDP'yî, Kurdan û weçînayoxan dewam keno. Îqtîdar keno ke pê tedaye, hîleyan, zorbazî û bêhuqûqîye weçînayîşê 31'ê Adare de çi nêkewto destê ci bigêro. Ewro hemşaredarê Amedî Selçuk Mizrakli ame destbendkerdene, hemşaredara Kayapinarî Kezîban Yilmaze, hemşaredarê Bîsmîlî Orhan Kara, hemşaredarê Şaredarîya Karazî Rojda Nazliere ameyî destbendkerdene. No prosesêko zelal ê darbeya sîyasî yo.


Ez wazena tîya ra muxalefetê komelkî û sîyasî rê veng bidî ke bêvengîya şima û pêgoşîya şima tewirêko rast nîya. Ganî verba naye Tirkîya de û pêroyê dinya de vengê xo berz bikê. Wext wextê bêvengîya nîyo. Wazenê şar vajo ke eke wekîlan rê wina kenê do ma rê se bikê. Ma reyna cewab bidê ke şima heta ke eşkenî dormeyê ma pê TOMA'yan û pêroyê wesayîtanê xo bigêrê, reyna zî ma do fikrê xo vajê û nêtersê ke verba polîtîkayanê îşxalan û şerî vengê xo vejê. Na babete de tewirê ma eşkera yo. Îqtîdar wazeno ke komel biko hemparê sucanê xo. Bi seyan merdimî merdî, bi seyan merdimî mecbur mendî ke koç bikerî, wareyanê xo ra bîyî. Goreyê doneyanê Neteweyê Yewbîyayeyî 165 hezarî ra zêdêr û goreyê çimeyanê herêmî zî 300 hezarî ra zêdêr merdimî keyeyê xo ra bîyî. La kerdişê şima nêeşkayê rewşa ekonomîke weşêr bikê. Çira? Xora pêroyê kerdişê şima seba nimnayîşê rewşa ekonomîke yo. Ez wazena partîyanê muxalefetî rê vajo ke seba ke şima verba kerdişanê îqtîdarî tewirêko rast nêmojna, şima nêeşkenê hetê komelî ra sey îqtîdaro alternatîf bêro qebulkerdene.HDP'yî ra ber partîyêka muxalefetî çin a ke bi hêwayêkê eşkera vaje polîtîkayê şer û îşxalî welatî rê kar nêkeno."