Oluç: Tirkîya bîye welatê cergan

Wekîlserekê Gruba HDPyî Oluçî îfade kerd ke Tirkîya bîye welatê cergan û derheê kiştişê Qasim Silêmanîyî de zî vat: "Zaf bitehlûke yo.''

Wekîlserekê Gruba HDPyî Saruhan Oluçî Merkezê Pêroyî yê HDPyî de kombîyayîşêkê çapemenîye kerd û rojdem ercna. Ercnayîşanê Oluçî ra tay beşî wina yê:

Saruhan Oluçî derheqê tezkereyê Lîbya de vat: "Vera tezkereyî pêro muxalefet tewirêko hempar mojna û vat 'ney'. Dezgehê sivîlan zî vanê ney. Nê pêro mojnenê ke tezkereyê Lîbya aslê xo de tezkereyê şerî yê AKP û MHPyî yo. Lîbya kelaya peyêne ya têgêrayîşê Îhvanî yo. Coka AKP wazeno paştî bido ci. Tirkîya polîtîkayê xo yê teberî bi şerî kena. Reya verêne Rojawan îşxal kerd nika zî Lîbya. Dîplomasîya Tirkîya hînî bîye têmîyan. 

Tirkîya hînî bîye welatê leşkeranê bipereyan û cergan û hetê îqtîdaro ke wayîrê nê zîhnîyetî yo ra yena hukmkerdene. Verê cû Tirkîya Lîbya û Sûrîye ra leşkerî ardêne tîya, nika tîya ra erşawena ê cayan. No do bibo semedê alozîya zereyê welatî zî. 

Kiştişê Qasim Silêmanî do bibê semedê netîceyanê xiraban. Herême ha vêşena. Seba naye çareserîya ma na ya ke ganî çareserîya leşkerî ney sîyasî bêra kerdene. DYA bi na gama xo vera Îranî şerêk da destpêkerdene. Na gamêka zaf bitehlûke ya.

Ekonomî vera keweno bin. Gamê îqtîdarî yê ekonomîyî nêeşkenê enflasyon û bêkarîye çin bikê. La îqtîdar seba ke nê nêrê muneqeşakerdene tezkereyê Lîbya vist rojdem. Seba ke bêçareyîyanê xo yê polîtîkaya zereyî binimno bi polîtîkaya teberî keno ke çimanê şarî pabido."