Serekwekîlê Koma HDPyî Saruhan Oluçî Meclîs de kombîyayîşê çapemenîye serûber kerd û rojdem ercna.
Oluçî destbendkerdişê Hemşaredara Gîyadînî ya HDPyî Betule Yaşar vist vîrî û eşkera kerd ke no amadekarîya seba tayînkerdişê qeyûmî ya.
Oluçî vat: ''11 şaredarîyê ma mendbî, ma zanenê ke qeyûm do nê cayan de bêrê cakerdene. Çira vera Şaredarîya Gîyadînî hêriş yeno kerdene? Çunke Şaredarîya Gîyadînî de seba şar û cinîyan zaf xebatî yenê kerdene. Îqtîdar têna dişmenê şaredarîyanê HDPyî nîyo, heman wextî de dişmenê ê şaredarîyan o ke seba cinîyan xebitîyenê. Karo verên ê qeyûman wedaritişê tabeleyanê kurdkî, o diyîn zî qedînayîşê xebatanê seba cinîyan o.''