Heyetê Îmraliyî yo ke Pervîne Buldan, Sirri Sureyya Onder û Ahmet Turkî ra yeno pê, ewro Serekê Partîya Gelecekî Ahmet Davutoglu zîyaret kerd.

Onderî derheqê zîyaretî de qisey kerd û vat: ''Ma derheqê tecrubeyanê verênan de qisey kerd û Davutogluyî ra pêşnîyaz, rexne û hişyarîyê ci waştî. Înan zî agahîyî dayî ma. Ma do Selahattîn Demîrtaşî zîyaret bikerê û dima eşkerayîyêka hîra bidê.''

Davutogluyî zî heyetî rê sipas kerd û vat ke pêvînayîşê înan samîmî bîyo. Davurogluyî vat: ''Tamîr bi demokrasîyê zereyî beno. Ganî pêro terefî û no heyet bê ke bi provakasyonan bixapîyê seba awankerdişê haştîya Tirkîya têbigêrê.''

Onderî rê ame perskerdene ke Hemsereka DEM Partî Tulaye Hatîmogullari bi qiseyanê xo yê serê Gazze çi qesit kerdo. Onderî wina cewab da: ''Qiseyê Tulaye Hatîmogullari xelet ameyî ercnayene. Ma prosesê haştîye felaketî ser o pênase nêkenê; bereketî ser o pênase kenê. Wa çew nê qiseyan ser o manayêke nêvejo.''