Rêxistina Partîya Demokratîke ya Şaran (HDP) verê kongreya xo ya ke do mengêke dima ra bikerê bi şîarê semedê cuyeyêka rêxistinkerdîye pêro pîya banê partîye de  kombîyayîşê şarî kerd. Parlamenterê HDPyî yê Dêrsimî Alîcan Onlu zî tewrê kombîyayîşî bi.

Onluyî ke tîya qisey kerd Îtîfaqê Cumhur û Îtîfaqê Mîletî rexne kerdî û derheqê Îtîfaqê Demokrasî de mesajê muhîmî dayî. Onluyî ard ziwan ke seba ke AKP vîjnayîşê 7ê hezîrane de têna îqtîdar nêbi hêrişê partîya înan  û rêxitinanê demokratîkî yê şarî keno vat înan sey HDPyî vera nê hêrişanê îqtîdarî prosesêko newe da destpêkerdene. Onluyî HDP sey hêzo ke eşkeno rejîmê Tirkîya bibedilno name kerd û vat hinî her kes zano ke bê HDPyî qet bedilnayîşêk nêbeno.

Onluyî vat: ''Ma zî vanê ke têna pê HDPyî nêbeno. Ganî heme hêzê demokrasîyî yê Tirkîya bibê yew. Seba ke ma nika vera yew îtîfaqî yê no nîno na mana ke ma paştî danê îtîfaqê bînî. Ganî Îtîfaqê Cumhurî werte ra bêro wedaritene la Îtîfaqê Mîletî zî nêeşkeno meseleyan çareser bikero. Nika hîrê îtîfaqî estê. HDPyî sey îtîfaqê hîrêyînî Îtîfaqê Demokrasîyî na ro. HDP xo ra bi xo îtîfaqê demokrasîyî yo. Ma kenê ke îtîfaqê xo hîra bikerê. Ma verê vatenê ma eşkenê îqtîdarî birijnê. Nika ma hedefê xo pîlêr kerd. Ma vanê ma eşkenê îqtîdarê neweyî zî bewlî bikerê.''

Alîcan Onluyî bale ante deklarasyonê înan ser û vat: Î''tîfaqê Mîletî qala sîstemê parlanterî yê bihêzî  keno.  Ma ê zî cîya genê dest. Xora seserre yo no sîstem bibê. Çînhesibnayîşê kurdan û elewîyan bi AKPyî dest pênêkerd. Sîstemê parlamenterî yê bihêzî yê seserran de no înkar bibi. Coka ma nê îtîfaqî de pê nêkenê. Ma sey HDPyî vanê sîstemê parlamenterî yo ke bi demokrasîya cayîye ya bihêze bîyo bihêz. Nê sîstemî de xoserîya cayîye, xoîdarekerdişê şarî esto. Ganî hêzê merkezî yê dewlete bidîyo îdareyanê cayîyan. Îtîfaqê Mîletî vano ê do rejîmî tamîr bikerê, ma vanê ma do sîstemêkê neweyî înşa bikerê.''