Rayberê Şarê Kurdî Abdullah Ocalanî menga Gulane de vatibi, “Serra 2013 de ma kamcîn nuqte de bîyî, nika zî ma heman nuqte de yê” û seba dîyalog û muzakereyî veng da.

Rixmê polîtîkayanê faşîzanan ê AKP’yî ‘Platformê Demokrasî û Kede ya Herême’ ke 305 organîzasyonanê cimatkî yê sivîlan ra yena pê Amed de deklarasyonêko hempar weşana û seba aşitîye û demokratîkbîyayîşî veng da.

Wan de zî amadekarîyêk bi nê amacî dewam kena. Organîzasyonê cimatkî yê sivîlî yê Wanî do wextêkê kilmî de bicemêyê û vilawekêka hempare biweşanê.

‘Pêşnîyarê Ocalanî Seba Aşitîye Firsendêko Newe yo’

Hemserekê Komeleya Cigêrayîşanê Kultur, Ziwan û Hunerî yê Wanî Salîh Sertkalî ANF’yî rê qisey kerd û vat ke waştişê şarê Kurd û Tirkî aşitîyêka mende ya.

Salîh Sertkalî qewimîyayîşê ke mîyanê di serranê peyênan de bîyê bi vîr vistî û vat, “Qewimîyayîşê ke bîyê, ma înan ra fam kenê ke aşitî prosesêko xeylî ercaye yo. Otorîteyê sîyasîyî eşkera nêkerê zî waştişo tewr pîl ê şarê Kurd, Tirk, Rûm, Çerkez û Ereban ê nê welatî no yo ke prosesêkê aşitîye newe ra dest pê bikero. Çîyo ke keweno milê ma sîyasetmedaran o yo ke cewab bidê nê waştişê şarî. Seba aşitîye ma reyna veng danê selahîyetdaran û heme hêzanê bitesîran. Bi vînayîşê mi aşitîya tewr xirabe şerî ra rindêr a.”

‘Ganî Cimat Seba Aşitîye Bikewo Mîyanê Cehdan’

Serekê Çev-Der ê Wanî Alî Kalçikî zî ard ziwan ke seba prosesê dîyalog û muzakereyî ê amade yê çi destê înan ra bêro bikerê û vat, “Seba heme ganeyan eke aşitî nêbo nêbeno. Cimatê ke aşitî mîyanê înan de çina tena merdim û ganeyî nê xoza zî werte ra wedarêna.

Vînayîşê Birêz Ocalanî ke bi serran o ano ziwan seba Rojakewtena Mîyanêne yenê manaya aşitîye. Şer ameyoxê ma raste ra wedareno, aşitî zî ameyoxî afernena. Loma ganî cimat seba aşitîye bikewo mîyanê cehdan. Qetîyen ganî goş bidê vengdayîşê Ocalanî. Seba pêroyîya şaranê Rojakewtena Mîyanêne na yewe xeylî muhîm a. ma wazenê na yewe bica bêro.”