Goreyê Raporê HDPyî yo ke bi wesîleya Hewteyê Heqanê Merdiman amade kerdo, 2015î ra nata vera partîye û pabesteyanê ci operasyonê qirkerdişê sîyasîyî de 15 hezar 530 kesî ameyî destbendkerdene. Mîyanê nînan ra 6 hezar kesî ameyî tepiştene. Wan de zî operasonê qirkerdişî bêmabên dewam kenê.

Wekîla HDPyî ya Wanî Muazzeze Orhan derheqê babete de ANFyî rê qisey kerd.

Orhane vat: ''Wan de her roje îdarekar û partîyîjê ma yenê tepiştene. Seba ke xebatê partîya ma bêrê qedînayene hêriş kenê. Wazenê ke şarî ra raqilnê. Seba ke îqtîdarî hem poltîkaya teberî de hem zî ya zereyî de vînî kerdo, krîzê ekonîmî û jan kontrolî ra vejîyayo ê nêeşkenê vera nê sîyasetê rijîyayî de cewabêk zî bidê şarî. AKPyî waşt ke pandemî zî goreyê rantê xo bişuxulno. Coka nika kewtê tengayî nêzanê senî ci ra vejî. Tenê çîyo ke destê înan ra yeno hêrişê vera HDPyî yo. Erzenê bananê HDPyî ser, cehd kenê ke xebatanê ma yê sîyasîyan vindarnê. Înan vatbi ma do biqedînê. Heta ke biqedînê hêriş kenê.''

Muazzeze Orhan vist vîrî ke vera Wanî polîtîkaya taybete yena rayraberdene û vat: ''Roja ke AKP ameyo ra nata polîtîkayêka taybete yena caardene. Qedexeyê bajarî nêqedîyenî. Sebebê nayî HDP û şarî yewbînan ra raqilnê. Serrêka peyêne pandemî kenê bahaneyê qedexeyan. La eleqeya pandemî çîn o. Wazenê şarî bitersnê, hêrişê partîya ma bikerê. Seba ke şarê Wanî xoverdayox o û tim paştî dano partîya ma pê nê qedexe, zextan û qeyûman wazenê qesasê vînîkerdişê xo bigerê. Xora walî zî wezîr zî no îtîraf kerd. La ê se kenê wa bikerê do ser mekewê.''